BAKI, AzerVoice

Suriyanın qərbindəki bir neçə vilayətdə meşə yanğınları baş verib.

AzerVoice xəbər verir ki, bu barədə ölkənin Fövqəladə Hallar və Təbii Fəlakətlərin Aradan Qaldırılması üzrə naziri Rayed əs-Saleh məlumat verib.

Bildiirlib ki, güclü külək və havanın istiləşməsi səbəbindən yanğın yayılmağa davam edir.

"Latakiya vilayətində meşə yanğınları getdikcə daha geniş ərazini əhatə edir. Biz artıq oraya bir neçə əlavə yanğınsöndürmə briqadası göndərmişik" – deyə, o bildirib.

Nazir həmçinin, yanğının yayıldığı ərazilərin dağlıq ərazilərdə yerləşməsi səbəbindən söndürmə prosesinin çətinləşdiyini qeyd edib.

Suriya vətəndaş müdafiəsi qüvvələri isə bildirib ki, Latakiya vilayətindəki yanğınların yayılmasına su mənbələrinin yanğın ocaqlarından uzaq olması və silahlı münaqişələrdən sonra vilayətdə qalmış hərbi sursatların partlaması səbəb olur. Xilasetmə işçilərinin qiymətləndirmələrinə görə, yanğın artıq Latakiyadakı meşələrə, kənd təsərrüfatı torpaqlarına və meyvə bağlarına ciddi ziyan vurub, amma hələ də alovu söndürmək mümkün olmayıb.

Suriya Vətəndaş Müdafiəsi yanğınların ölkənin paytaxtı Dəməşqdə, prezident sarayına yaxın ərazidə də başladığını bildirib. Hazırda yanğın söndürülüb, hadisə nəticəsində itkilər barədə məlumat verilməyib.

Yanğının səbəbi ilə bağlı araşdırmalar aparılır.