BAKI,AzerVoice, Fərid Mikayılov

Niderlandın Ayaks klubu İtaliyanın Milan komandasında çıxış edən Maksimilian İbrahimoviçi icarə əsasında heyətinə qatıb. 19 yaşlı hücumçu 2025/2026 mövsümünün sonunadək Amsterdam təmsilçisində çıxış edəcək. Müqavilədə transferin mövsüm sonunda tam reallaşdırılması üçün satınalma opsiyası da nəzərdə tutulub.

AzerVoice xəbər verir ki, dünya futbolunun əfsanəvi simalarından olan Zlatan Ibrahimoviçin oğlu Maksimilian yeni kluba keçidi ilə bağlı açıqlamasında atasının adının onun üçün təzyiq yaratmadığını vurğulayıb.

“Mən öz yolumu getmək istəyirəm. İbrahimoviç sadəcə addır. Mən Maksimilianam və öz hekayəmi yazmaq niyyətindəyəm”, – deyə gənc futbolçu bildirib.

Maksimilian İbrahimoviç Ayaksın hücumameyilli oyun fəlsəfəsinin onun üslubuna uyğun olduğunu qeyd edərək, sürət və driblinq keyfiyyətlərini daha da inkişaf etdirmək istədiyini söyləyib. O, Amsterdam klubunda daim qalibiyyət uğrunda mübarizə aparmaq və azarkeşlər üçün baxımlı futbol nümayiş etdirmək istədiyini də əlavə edib.

Qeyd edək ki, Maksimilianın atası Ayaks forması ilə 2001–2004-cü illərdə çıxış edib, iki dəfə Niderland çempionu olub və klubun tarixində mühüm iz qoyub. Təxminən 25 il sonra İbrahimoviç soyadı yenidən Johan Kruyff Arenasında səslənəcək.