BAKI,AzerVoice, Fərid Mikayılov
Braziliyalı futbolçu Vinisius hazırda İspaniyanın Real Madrid klubundakı vəziyyətdən tam razı deyil və bu mərhələdə Madrid təmsilçisi ilə müqaviləsini uzatmağa tələsmir.
AzerVoice xəbər verir ki, İngiltərənin Çelsi futbol klubu braziliyalı hücumçunu transfer etmək üçün 135 milyon funt sterlinq (təxminən 156 milyon avro) təklif etməyə hazırdır.
Vinisiusun Real Madridlə bağladığı müqavilə 2027-ci ilin iyun ayının sonunadək qüvvədədir. Mənbənin məlumatına görə, futbolçu klubdakı mövcud vəziyyətdən tam məmnun deyil və müqavilənin uzadılması məsələsində hələlik tələsmir.
Vinisius 25 yaşındadır və 2018-ci ildən etibarən Real Madridin formasını geyinir. O, Madrid klubunun heyətində üç dəfə İspaniya çempionu, iki dəfə UEFA Çempionlar Liqasının qalibi olub.
Ümumilikdə braziliyalı futbolçu Real Madridin heyətində 347 oyuna çıxıb, 111 qol vurub və 91 məhsuldar ötürmə ilə yadda qalıb.