BAKI,AzerVoice, Fərid Mikayılov
Beynəlxalq Futbol Federasiyası (FIFA) ilin yekunları üzrə yeni futbol mükafatının təsis edildiyini açıqlayıb. Bu barədə qurumun rəsmi internet saytında məlumat verilib.
AzerVoice xəbər verir ki, müvafiq razılaşma Dubay İdman Şurası ilə birgə əldə olunub.
Yeni mükafat 2026-cı ildən etibarən qüvvəyə minəcək və FIFA tərəfindən ilin gedişində həm meydanda, həm də meydandan kənarda ən yaxşı performans göstərən futbolçulara təqdim edilən yeganə illik rəsmi mükafat olacaq.
FIFA prezidenti Canni İnfantino yeni təşəbbüslə bağlı çıxışında Dubayla əməkdaşlığın dünya futbolunun inkişafı baxımından mühüm əhəmiyyət daşıdığını vurğulayıb:
“Biz futbolu sevən və onunla yaşayan Dubay şəhəri ilə səylərimizi birləşdirdiyimizə görə məmnunuq. Bu dünya futbol mükafatları təkcə mükafatlandırma mərasimi deyil, eyni zamanda futbolun qlobal təsirini ön plana çıxaran və ilin rəsmi olaraq ən yaxşı futbolçularını həm meydanda, həm də meydandan kənarda qiymətləndirən innovativ platforma olacaq”.
Qeyd edək ki, FIFA bundan əvvəl 2016-cı ildə təsis edilmiş “The Best FIFA Football Awards” mükafatını təqdim edirdi. Son mükafatlandırma mərasimi 2025-ci ilin dekabr ayının ortalarında Dohada keçirilib. Həmin mərasimdə ötən mövsümün ən yaxşı futbolçusu adına Fransanın PSJ klubunun hücumçusu Usman Dembele layiq görülüb.