BAKI,AzerVoice, Nailə Babazadə
Qətərdə keçirilən FİFA U17 Dünya Kuboku bu gün start götürdü və 27 noyabra qədər davam edəcək. Oyunlar Khalifa International Stadium və stadion ərazisindəki 8 ayrı meydançada keçiriləcək.
AzerVoice xəbər verir ki, hər iki ildən bir təşkil olunan və 1985-ci ildən bəri FİFA tərəfindən keçirilən 17 yaşadək futbolçuların Dünya Kuboku, gənc futbolçular üçün ən prestijli turnirlərdən biridir. Bu turniri ən çox qazanan komanda isə Nigeriyadır. Afrika komandası 1985, 1993, 2007, 2013 və 2015-ci illərdə çempion olmuşdur. 2023-cü ildə keçirilən son turniri isə ilk dəfə Almaniya qazanmışdır.
Bu il turnirdə 6 fərqli konfederasiyadan 48 ölkə iştirak edir. Komandalar hər biri 4 komandadan ibarət 12 qrupa bölünəcək və hər komanda qrup mərhələsində 3 oyun keçirəcək. Hər qrupdan ilk iki komanda və ən yaxşı səkkiz 3-cü yer komandası son 32-liyə yüksələcək. Turnir ərzində ümumilikdə 104 oyun keçiriləcək.
Türkiyə U17 komandası isə turnirdə indiyədək yalnız 2005-ci ildə iştirak etmişdir.