BAKI, AzerVoice, Fərid Mikayılov
Atletiko Madridin baş məşqçisi Dieqo Simeone, het-triklə komandasına qələbə qazandıran argentinalı hücumçu Xulian Alvarezin uzun müddət Madrid klubunda qalmasını istədiyini bildirib.
AzerVoice xəbər verir ki, gənc futbolçu Rayo Vallekano ilə oyunda vurduğu üç qolla həm quru seriyasına son qoydu, həm də komandasına La Liqada vacib 3 xal gətirdi.
Simeone matçdan sonra açıqlamasında argentinalını “komandanın ən yaxşı oyunçusu” adlandırıb.
“Xulian bizdə qalmalıdır. Biz ona dəstək olmalı, o da bizə kömək etməlidir ki, daha da yaxşı olsun. O, hər dəfə fərq yaradır və bizə çox fayda verir”- deyə o bildirib.
Alvarez son altı oyunda qol vurmamışdı və mövqeyi ilə bağlı narazılığı üzündən Barselona və Liverpul kimi klublarla adı transfer şayiələrində hallanırdı. Lakin Vallekano qarşısında vurduğu het-trik futbolçunun həm özünə, həm də komandasına böyük motivasiya verdi.