BAKI, AzerVoice, Fərid Mikayılov
Futbol dünyasının ən nüfuzlu fərdi mükafatı olan “Qızıl Top” (Ballon d'Or) bu il də Parisdə təqdim olunacaq.
AzerVoice xəbər verir ki, mükafatı təqdim etmək üçün Barselona əfsanəsi Ronaldinyo seçilib. 2005-ci ildə “Qızıl Top”u qazanan Ronaldinyo, bu dəfə səhnəyə qalxaraq futbolun ən prestijli mükafatını qalibə təqdim edəcək.
Mükafat üçün iki əsas favorit önə çıxır:
- Usman Dembele – ötən mövsüm PSJ ilə tarixi “üçlü” uğura imza ataraq komandasının aparıcı oyunçularından biri olub.
- Lamin Yamal – hazırda “Kamp Nou”nun yeni sensasiyası hesab olunan gənc ulduz Barselona forması ilə parlaq çıxışı ilə diqqət çəkib.
Əvvəlcə mükafatı təqdim etmək üçün 1994-cü ilin “Qızıl Top” qalibi, sabiq Barselona ulduzu Hristo Stoiçkov seçilmişdi. Lakin son anda qərar dəyişdirilib və Ronaldinyo əsas qonaq elan olunub.
Bir sıra məşhur futbolçuların Parisdə keçiriləcək mərasimə qatılmayacağı artıq məlumdur.
Kilian Mbappe – tədbiri televizordan izləyəcəyini açıqlayıb və Dembelenin qalib olacağına inandığını deyib.
Pedri və Robert Levandovski – Barselonanın iki ulduzu isə mükafatın əsas namizədləri arasında olmadıqları üçün mərasimdə iştirak etməyəcəklər.
Favorit hesab edilən Dembelenin mərasimdə iştirakı hələ də dəqiqləşməyib. Çünki Paris Sen-Jermen bazar ertəsi təxirə salınmış “Le Classique” oyununda Marsellə qarşılaşacaq. Hava şəraiti səbəbindən bazar günü baş tutmayan görüşün yeni tarixi eyni günə təyin olunub. Dembelenin zədəsi səbəbindən komandanın heyətində yer almadığı bildirilir. Bu səbəbdən, ulduz futbolçu Parisdə qalaraq “Qızıl Top” mərasimində iştirak edə bilər.