BAKI, AzerVoice, Nailə Babazadə

Birləşmiş Ərəb Əmirlikləri klubu Əl Vahda, 2024–25 mövsümünün sonunda Fənərbaxça ilə yollarını ayıran 36 yaşlı Dusan Tadiç-i heyətinə qatıb.

AzerVoice xəbər verir ki,Birləşmiş Ərəb Əmirlikləri təmsilçisi Əl Vahda, yeni mövsüm öncəsi Fənərbaxça ilə yollarını ayıran 36 yaşlı serbiyalı futbolçu Dusan Tadiçin transfer olunduğunu açıqlayıb.

Futbola vətəninin Voyvodina komandasında başlayan serbiyalı oyunçu, 2010-cu ildə Qroningen klubuna transfer olub. Hollandiya klubunda 2 mövsümdə 76 oyuna çıxaraq 14 qol vuran Tadiç, 2012-ci ilin yayında Tventeyə keçib. Burada oynadığı 85 oyunda 32 qol və 30 assistlə diqqət çəkən təcrübəli futbolçu, 2014–15 mövsümü öncəsi 14 milyon avroya Premyer Liqanın yolunu tutub.

Southampton ilə 4 mövsümdə 162 oyuna çıxan Tadiç, 23 qol vurub və 32 məhsuldar ötürmə verib.

Dusan Tadiç, 2018-ci ilin yayında təxminən 14 milyon avro qarşılığında yenidən Eredivisieyə qayıdaraq Ayaksa transfer olunub. Paytaxt təmsilçisi ilə keçirdiyi 5 mövsümdə 241 oyunda 105 qol və 108 assistlə çıxış edib.

2018–19 mövsümündə Eredivisie-də qol kralı olan Tadiç, 2018–19, 2020–21 və 2021–22 mövsümlərində Ayaks ilə çempionluq yaşayıb. Bundan əlavə, 5 illik Ayaks karyerasında 2 dəfə Hollandiya Kuboku, 1 dəfə isə Hollandiya Superkuboku qazanıb.

2023–24 mövsümü öncəsi azad agent kimi Fənərbaxçaya keçən təcrübəli futbolçu, sarı-lacivərtli forma ilə 109 oyunda iştirak edib. Tadiç ilk mövsümündə 16 qol və 16 assistlə oynayıb, Fənərbaxçadakı son ilində isə 53 oyunda 13 qol və 16 məhsuldar ötürmə ilə çıxış edib.