BAKI,AzerVoice
Səudiyyə Ərəbistanının paytaxtında Körfəz-ABŞ sammitinin keçirilməsi gözlənilir. Bu sammit, ABŞ Prezidenti Donald Trampın Səudiyyə Ərəbistanı, Qətər və Birləşmiş Ərəb Əmirliklərinə etdiyi tarixi xarici səfərinin bir hissəsi kimi həyata keçirilir.
Bu, ABŞ prezidentinin ilk rəsmi xarici səfəri olmaqla, onun administrasiyasının ABŞ ilə Körfəz ölkələri arasında əməkdaşlığa verdiyi əhəmiyyəti göstərir. Sammit, eyni zamanda, ABŞ prezidentinə Yaxın Şərqdə ABŞ-ın iştirakına dair baxışlarını təqdim etmək və regiondakı milli maraqlarını müəyyənləşdirmək üçün bir fürsət olacaq.
Bu, ABŞ ilə Körfəz Əməkdaşlıq Şurası ölkələri arasında keçirilən beşinci sammit olacaq. Əvvəlki dörd sammitdən birincisi 2015-ci ilin mayında Kemp-Deviddə, ikincisi 2016-cı ilin aprelində, üçüncüsü isə 2017-ci ilin mayında Səudiyyə Ərəbistanının paytaxtı Ər-Riyadda Donald Trampın ilk prezidentlik müddəti zamanı keçirilmişdi. Dördüncü sammit isə 2022-ci ilin iyul ayında baş tutmuşdu və bu görüşə Misir, İordaniya və İraq kimi ərəb ölkələri də qatılmışdı.
Bazar günü Səudiyyə kralı Salman bin Əbdüləziz Körfəz ölkələrinin liderlərini Ər-Riyadda keçiriləcək Körfəz-ABŞ sammitində iştirak etməyə dəvət edib.
Küveyt əmiri Şeyx Məşəl əl-Cabir əs-Sabah Səudiyyə kralından yazılı dəvət məktubu alıb. Məktubu Küveytdəki Səudiyyə səfiri Şahzadə Sultan bin Səad bin Xalid təqdim edib. Oman sultanı Heysəm bin Tariq da kral Salman bin Əbdüləzizin imzası ilə sammitə dəvət məktubu alıb. Məktubu Səudiyyə səfiri Oman xarici işlər naziri ilə görüş zamanı təqdim edib.
Bəhreyn kralı Həməd Al-Xəlifə də kral Salmandan yazılı dəvət alıb. Məktubu Səudiyyənin Bəhreyndəki səfiri Nayif əs-Sədir təqdim edib.
Qeyd edək ki, Prezident Trampın bu səfəri Səudiyyə Ərəbistanının bölgədəki əsas və strateji rolunu şübhə doğurmadan əks etdirir. ABŞ Səudiyyə Ərəbistanını regionda təhlükəsizlik və sabitliyi gücləndirməyə yönəlmiş səylərdə əsas tərəfdaş hesab edir.