BAKI, AzerVoice
Misir, Qətər və ABŞ-dan olan vasitəçilər Qəzza zolağında atəşkəs rejiminin bərpası üçün səylərini davam etdirirlər.
AzerVoice xəbər verir ki, bu barədə Misirin xarici işlər naziri Bədr Əbdül-Ati İordaniyanın paytaxtı Əmmanda keçirilən mətbuat konfransında çıxış edərkən deyib.
“Misir, Qətər və ABŞ Qəzzada döyüş əməliyyatlarını dayandırmaq üçün ciddi səylər göstərməkdə davam edir. Qəzzada qan tökülməsinin qarşısı alınmalı, girovlar azad edilməli və bölgəyə humanitar yardımın çatdırılması təmin olunmalıdır” – deyə, Nazir qeyd edib.
Misir XİN rəhbərinin fikrincə, İsrailin Qəzzada həyata keçirdiyi aclıq siyasəti“əsas insan haqlarını pozur, bölgənin özü isə qida çatışmazlığı səbəbilə fəlakətli vəziyyətdədir.
Eyni mətbuat konfransında çıxış edən Əbdül Atinin iordaniyalı həmkarı, Əymən əs-Səfədi qeyd edib ki, İsrail hakimiyyəti Qəzzanı yaşanmaz yerə çevirmək üçün əllərindən gələni edirlər.
“Beynəlxalq ictimaiyyət Qəzzadakı İsrail təcavüzünü dayandıra bilmədi, amma biz ona qarşı çıxmaq üçün səylərimizi davam etdirəcəyik” – deyə, əs-Səfədi vurğulayıb.
Son günlərdə ABŞ prezidentinin xüsusi nümayəndəsi Stiven Uitkoff Qəzzada döyüşlərin dayandırılması ilə bağlı razılığa gəlmək üçün növbəti cəhd edib. Onun irəli sürdüyü yeni təklif Qəzzada dərhal 60 günlük atəşkəsi və birinci həftədə iki mərhələdə sağ qalan 10 israilli girovun azad olunmasını nəzərdə tutur. Həmin müddət ərzində HƏMAS İsrail tərəfinə daha 18 girovun cəsədini təhvil verməlidir. Əvəzində İsrail əvvəlcədən razılaşdırılmış siyahılara əsasən fələstinli məhbusları azad edəcək. Sənəddə, həmçinin, BMT və digər beynəlxalq təşkilatlar vasitəsilə Qəzzaya humanitar yardımın çatdırılmasının bərpası nəzərdə tutulur. Elə həmin gün Ağ Evin mətbuat katibi Kerolayn Livitt brifinqdə bildirib ki, İsrail bu planı HƏMAS-a təqdim olunmamışdan əvvəl təsdiqləyib.
Ötən gün HƏMAS ABŞ prezidentinin xüsusi nümayəndəsinin təklifinə cavablarını vasitəçilərə təqdim ediblər.
“HƏMAS 10 israilli girovu azad etməyə və 18 nəfərin cəsədini təhvil verməyə hazırdır – əvəzində İsrail həbsxanalarından əvvəlcədən razılaşdırılmış sayda fələstinli məhbusun azad olunmasını tələb edir” - deyə, HƏMAS-ın verdiyi bəyanatda qeyd olunub.
Lakin HƏMAS əlavə edib ki, cavablarında həmçinin Qəzzada atəşin tam şəkildə dayandırılması, İsrail qoşunlarının bölgədən çıxarılması və bölgəyə humanitar yardımın maneəsiz çatdırılması tələbləri də yer alır.
Uitkoff və İsrail rəhbərliyi isə bu cavabı faktiki olaraq təklifdən imtina kimi qiymətləndiriblər