BAKI, AzerVoice

HƏMAS hərəkatı İsrailin Qəzza zolağında humanitar yardımın bölgüsünə dair irəli sürdüyü yeni mexanizmlərə kəskin reaksiya verib.

AzerVoice xəbər verir ki, HƏMAS-ın yaydığı rəsmi bəyanatda İsrailin yardım mexanizmlərinin Cenevrə Konvensiyalarına zidd olduğu və soyqırımı siyasətinə vaxt qazandırmaq məqsədi güddüyü qeyd olunub.

Hərəkat bu təşəbbüsü siyasi şantaj və beynəlxalq hüququn açıq pozuntusu kimi dəyərləndirib.

Bəyanat bir sıra beynəlxalq humanitar təşkilatlar və BMT rəsmilərinin son açıqlamalarına cavab olaraq verilib. Sözügedən təşkilatlar İsrailin yardım bölgüsü planlarını insan hüquqlarına uyğun olmayan yanaşma kimi tənqid etmiş və bu cür mexanizmlərə qarşı çıxmışdılar.

HƏMAS bu iddiaları beynəlxalq təzyiqləri azaltmaq üçün manipulyasiya adlandırıb və vurğulayıb ki, yardımların yeganə qanuni bölgüsü yalnız BMT və ixtisaslaşmış beynəlxalq qurumların səlahiyyətində olmalıdır. Onlar işğalçı qüvvələrin və ya onların vasitəçilərinin bu prosesə daxil olmasının yolverilməz olduğunu bəyan ediblər.

Eyni zamanda, HƏMAS beynəlxalq ictimaiyyəti İsrailin yalan məlumatlarına aldanmamağa və humanitar yardımın tam şəkildə bərpası üçün sərt tədbirlər görməyə çağırıb. Hərəkatın fikrincə, Qəzzada aclığın yayılması və yardımın qarşısının alınması İsrailin planlı siyasətidir və bu, ciddi beynəlxalq reaksiya tələb edir.

Xatırladaq ki, İsrail bu ilin əvvəlində HƏMAS-la əldə edilən atəşkəs razılaşmasına baxmayaraq, 18 mart tarixində hərbi əməliyyatları bərpa edib və o vaxtdan bəri Qəzzaya humanitar yardım girişini faktiki olaraq dayandırıb.