Oktyabrın 22-də insan alverinə qarşı mübarizəyə dair maarifləndirmə tədbirləri çərçivəsində turizm sənayesi nümayəndələri üçün təlim təşkil olunub. Təlim Dövlət Turizm Agentliyinin təşkilatçılığı ilə Daxili İşlər Nazirliyinin İnsan Alverinə Qarşı Mübarizə Baş İdarəsinin şöbə müdiri Araz Babayev, İnsan Alveri ilə Mübarizə üzrə QHT Koalisiyasının sədri Mehriban Zeynalova və koalisiyanın üzvü olan Qadın Təşəbbüsü və Sosial Problemlərin Həllinə Yardım İctimai Birliyinin təlimçisi Günel Ələkbərova tərəfindən keçirilib.

İranın xarici işlər naziri Abbas Əraqçi bəyan edib ki, Vaşinqton öz “tamahkar və təkəbbürlü siyasətindən” imtina etmədikcə Tehran ABŞ-la danışıqlara qayıtmayacaq. Rəsmi İSNA agentliyinin xəbərinə görə, Əraqçi jurnalistlərə açıqlamasında bildirib ki, “ABŞ-lı tərəflə əvvəlki dövrlərdə aparılan danışıqlar, o cümlədən Nyu-Yorkda baş tutan görüşlər, Vaşinqtonun həddindən artıq tələbləri və qeyri-real iddiaları səbəbindən dayandırılıb”.

İtaliyanın Baş naziri Corcia Meloni bildirib ki, Hamas Fələstinin gələcəyində siyasi rol oynamaqdan imtina etmədən və silahı yerə qoymadan, İtaliyanın Fələstin Dövlətini tanıması mümkün deyil. Meloni bu fikirləri 23–24 oktyabrda Brüsseldə keçiriləcək Avropa İttifaqı (Aİ) Liderlər Zirvəsi öncəsi parlamentin yuxarı palatası olan Senatda çıxışı zamanı səsləndirib. O, həm beynəlxalq gündəmin aktual məsələləri, həm də hökumətinin bu məsələlərə münasibəti barədə məlumat verib.

İraq Baş naziri Məhəmməd Şiəəs-Sudani bu gün (çərşənbə günü) bəyan edib ki, İraq hökuməti ABŞ-la ikitərəfli əməkdaşlığın davamlı dinamikasını qorumağa və son aylarda əldə edilmiş razılaşma və anlaşmaların icrasını davam etdirməyə böyük önəm verir. Sudani bu fikirləri ABŞ Dövlət katibi Marko Rubio ilə telefon danışığı zamanı səsləndirib. İraq hökumətinin yaydığı bəyanata görə, baş nazir bildirib ki, hökumət iqtisadi əlaqələri genişləndirmək, cəlbedici investisiya mühitini inkişaf etdirmək, həmçinin ABŞ şirkətlərinin İraqda fəaliyyət göstərməsi üçün əlverişli şərait yaratmaq istiqamətində çalışır.

Ümumdünya Səhiyyə Təşkilatının (ÜST) baş direktoru Tedros Adhanom Gebreyesus xəbərdarlıq edib ki, Qəzza zolağı “nəsillər boyu davam edəcək” miqyasda səhiyyə fəlakəti yaşayır. Tedros “BBC” telekanalına açıqlamasında bildirib ki, Qəzza əhalisinin mürəkkəb ehtiyaclarını qarşılamaq üçün humanitar yardımların miqyası kəskin şəkildə artırılmalıdır. O, Qəzzada atəşkəsin əldə edilməsini alqışlasa da, atəşkəsdən sonra artan yardımın hələ də səhiyyə sisteminin bərpası üçün kifayət etmədiyini vurğulayıb.

ABŞ-ın Dövlət katibi Marko Rubio Qəzzada əldə olunan atəşkəsin detalları və icrası ilə bağlı müzakirələr aparmaq üçün İsrailə səfər edəcək. İsrail mediasında yayılan xəbərlərə görə, Rubio iki günlük səfəri çərçivəsində sabah İsrailə çatacaq. Məlumata görə, səfərin əsas gündəm mövzusunu Qəzzada razılaşdırılan atəşkəsin tətbiqi təşkil edir. Rubionun səfəri ABŞ-ın bölgədəki diplomatik səylərinin davamı kimi qiymətləndirilir. Qeyd edilir ki, bundan öncə ABŞ vitse-prezidenti Cey Di Vans, Prezident Donald Trampın Yaxın Şərq üzrə xüsusi nümayəndəsi Stiv Vitkoff və Trampın kürəkəni Cared Kuşner də bu həftə Qəzzada atəşkəsin davamlılığını təmin etmək məqsədilə İsrailə səfər etmişdilər.

Fransa hökuməti Dassault Aviation tərəfindən istehsal olunan Rafale döyüş təyyarələrinin sayını əhəmiyyətli dərəcədə artırmaq niyyətindədir. Ölkənin 2026-cı il dövlət büdcəsi layihəsində Müdafiə Nazirliyinin hazırkı 225 ədədlik hədəfi 286 təyyarəyə qədər yüksəltməyi nəzərdən keçirdiyi qeyd olunub.

Uqandada baş verən ağır yol qəzası nəticəsində ən azı 63 nəfər həyatını itirib, onlarla insan isə yaralanıb. Uqanda Polis Xidmətinin məlumatına görə, qəza bu gün yerli vaxtla saat 00:15 radələrində Kampala–Qulu magistral yolunda baş verib. İki sərnişin avtobusu iki başqa avtomobili ötməyə çalışarkən bir-biri ilə toqquşub, nəticədə yolda zəncirvari qəza yaranıb. Rəsmilərin bildirdiyinə görə, toqquşan nəqliyyat vasitələrindəki sərnişinlərin əksəriyyəti hadisə yerindəcə dünyasını dəyişib. Bütün avtobus sərnişinlərinin həyatını itirdiyi ehtimal olunur.

Böyük Britaniya Müdafiə Nazirliyi bəyan edib ki, kiçik sayda britaniyalı hərbi planlaşdırma zabitləri Qəzzada sabitliyin təmin edilməsinə yönəlmiş səylərə dəstək məqsədilə İsrailə göndərilib. Onlar ABŞ-ın rəhbərlik etdiyi birgə əməliyyat qrupuna qoşulublar. ABŞ, Misir və Qətər bu həftə İsrail və “HƏMAS” arasında atəşkəs sazişinin ilkin mərhələlərinin möhkəmləndirilməsi və ABŞ prezidenti Donald Trampın 20 maddəlik müharibəyə son qoyma planının həyata keçirilməsi üçün intensiv vasitəçilik aparır.

Çoxmillətli Dəniz Qüvvələri (Combined Maritime Forces – CMF) çərşənbə axşamı bəyan edib ki, Pakistan Hərbi Dəniz Qüvvələrinə məxsus gəmi Ərəb dənizində 972 milyon dollardan çox dəyərində narkotik maddə ələ keçirib. 47 ölkədən ibarət olan bu beynəlxalq dəniz koalisiyasına Səudiyyə Ərəbistanı, ABŞ, Fransa və İspaniya da daxildir. CMF-in bəyanatında bildirilib ki, Pakistan dəniz qüvvələrinin əməkdaşları şənbə günü birinci yelkənli qayıqa çıxaraq 2 tondan çox “kristal metamfetamin” müsadirə ediblər. Əldə olunan maddənin dəyəri təxminən 822,4 milyon dollar təşkil edir.

Ekvadorun cənubunda, El Oro əyalətində 5,5 bal gücündə zəlzələ baş verib. ABŞ Geoloji Tədqiqatlar Mərkəzinin (USGS) məlumatına görə, ölkənin cənubundakı El Oro əyalətinə bağlı Arenillas qəsəbəsinin 11,5 kilometr cənub-şərqində, yerli vaxtla saat 19:05-də 5,5 bal gücündə təkan qeydə alınıb. Zəlzələ 73,6 kilometr dərinlikdə baş verib. Zəlzələdə insan tələfatı və zərər barədə hələ açıqlama verilməyib.

İranın ali dini lideri Ayətullah Əli Xamenei ABŞ Prezidenti Donald Trampın “İranın nüvə obyektlərinin bombalanaraq məhv edildiyi” iddiasını “xülya” adlandırıb və Vaşinqtonun yeni danışıqlar təklifini qəti şəkildə rədd etdiyini bildirib. Bu haqda Xamenei 43 günlük fasilədən sonra ilk ictimai çıxışında deyib. “ABŞ prezidenti lovğalanaraq deyir ki, biz İranın nüvə sənayesini bombaladıq və məhv etdik. Yaxşı, qoy o, bu xəyalla yaşasın!”-deyə o bildirib.