BAKI,VOA,Yusif Şərifzadə

ABŞ-ın texnologiya şirkəti Broadcom 2031-ci ilin sonunadək Apple üçün xüsusi çiplərin hazırlanması və tədarükünü nəzərdə tutan yeni əməkdaşlıq razılaşması imzaladığını açıqlayıb.

VOA xəbər verir ki, yeni razılaşma Broadcom-un Apple-ın əsas təchizatçılarından biri kimi mövqeyini daha da möhkəmləndirir. Razılaşma investorlar arasında Apple-ın yaxın illərdə Broadcom-un istehsal etdiyi komponentləri öz hazırladığı çiplərlə əvəz edə biləcəyi ilə bağlı narahatlıqları da azaldıb.

Hazırda Broadcom iPhone smartfonlarında mobil rabitə, simsiz internet və qısa məsafəli simsiz əlaqə texnologiyaları üçün istifadə olunan radio tezlikli çiplər, eləcə də digər şəbəkə yarımkeçirici komponentlərini təmin edir.

Mütəxəssislərin hesablamalarına görə, Apple Broadcom-un illik gəlirlərinin təxminən 20 faizini formalaşdırır. Analitiklər bildirirlər ki, bu razılaşma Apple üçün çip tədarükünün sabitliyini təmin edir və şirkətin bəzi əsas komponentləri qısa müddətdə özü istehsal etmək məcburiyyətini aradan qaldırır. Broadcom üçün isə müqavilənin uzadılması uzun illərdir davam edən əməkdaşlığın qorunması baxımından mühüm əhəmiyyət daşıyır.