BAKI,VOA,Yusif Şərifzadə

Birləşmiş Millətlər Təşkilatının insan hüquqları üzrə qurumu İsrailin Qəzza həkimi Hüsam Əbu Safiyanı saxlamasını əsassız hesab edərək onun dərhal azad edilməsini tələb edib.

VOA xəbər verir ki, BMT-nin Əsassız Saxlanmalar üzrə İşçi Qrupu İsrailin bu addımının Ümumdünya İnsan Hüquqları Bəyannaməsinin və Mülki və Siyasi Hüquqlar haqqında Beynəlxalq Paktın bir neçə maddəsinə zidd olduğunu bildirib.

Qurum bəyan edib ki, Hüsam Əbu Safiyanın dərhal azad edilməsi, ona kompensasiya və beynəlxalq hüquqa uyğun digər hüquqi təminatların verilməsi zəruridir. Hüquq müdafiəçiləri və həkimin vəkili onun həyatının ciddi təhlükə altında olduğunu bildirirlər.

BMT qurumu həmçinin bu işin daha geniş narahatlıqlar doğurduğunu qeyd edib. Bildirilib ki, daxil olan bir neçə oxşar müraciət ölkədə əsassız saxlanmaların geniş yayılmış və ya sistemli xarakter daşıya biləcəyini göstərir.

İsrail Həbsxana Xidməti isə Hüsam Əbu Safiya və digər həkimlərlə həbsdə pis rəftar edilməsi barədə iddiaları rədd edib.