BAKI,VOA, Fərid Mikayılov

Avropa İttifaqının (Aİ) Xarici Əlaqələr və Təhlükəsizlik Siyasəti üzrə Ali Nümayəndəsi Kaya Kallas, İsrailin ifrat sağçı Milli Təhlükəsizlik Naziri İtamar Ben-Qvirə qarşı sanksiyaların tətbiq edilməsi məsələsində ittifaq daxilində yekdilliyin olmadığını bəyan edib.

VOA xəbər verir ki, Lüksemburqda keçirilən Aİ Xarici İşlər Nazirləri Toplantısından əvvəl mətbuata açıqlama verən Kallas, bir çox üzv dövlətin bu təklifi dəstəkləməsinə baxmayaraq, qərarın qəbulu üçün tələb olunan səs birliyinin hələlik təmin edilmədiyini bildirib.

Aİ Daimi Nümayəndələr Komitəsinin (COREPER) qapalı iclaslarında aparılan müzakirələrdə təkcə İtamar Ben-Qvir deyil, həm də İsrailin Maliyyə naziri Betsalel Smotriçə qarşı aktivlərin dondurulması və səyahət qadağası kimi sanksiyaların tətbiqi nəzərdən keçirilib.

Lakin üzv ölkələr arasında kəskin mövqe ayrılığı yaranıb; belə ki, Almaniya sanksiyaların yalnız Ben-Qvir ilə məhdudlaşdırılmasını və Smotriçin siyahıdan çıxarılmasını tələb etdiyi halda, Çexiya Ben-Qvirə qarşı hər hansı bir məhdudiyyətin tətbiqinə qəti şəkildə qarşı çıxan yeganə ölkə olub.