BAKI,VOA, Fərid Mikayılov

Artemis II missiyası ilə Aya doğru hərəkət edən heyət Ayın arxa tərəfinə keçərkən təxminən 40 dəqiqə ərzində Yer ilə bütün əlaqəni itirəcək.

VOA xəbər verir ki, bu müddətdə radio və lazer siqnalları Ay tərəfindən bloklanacaq.

Məlumata görə, ABŞ-ın Hyuston şəhərində yerləşən nəzarət mərkəzi ilə əlaqənin tam kəsiləcəyi bu zaman intervalında astronavtlar kosmosda tam təcrid vəziyyətində qalacaqlar.

Missiyanın pilotu Victor Glover bildirib ki, bu anları dünya üçün birləşdirici fürsət kimi görür və insanları astronavtların yenidən əlaqəyə çıxması üçün xoş niyyətlər göndərməyə çağırıb.

Qeyd olunur ki, bu cür “radio səssizliyi” fenomeni ilk dəfə deyil. Apollo 11 missiyası zamanı da Ayın arxa tərəfində əlaqə kəsilmiş, Michael Collins bu müddətdə özünü “tam təcrid olunmuş” hiss etdiyini qeyd etmişdi.

Ekspertlər bildirirlər ki, gələcəkdə bu kimi əlaqə kəsintilərinin qarşısını almaq üçün Avropa Kosmik Agentliyi tərəfindən “Moonlight” kimi layihələr hazırlanır. Bu layihələr Ay ətrafında peyk şəbəkəsi quraraq fasiləsiz rabitəni təmin etməyi hədəfləyir.

Hazırda dünya üzrə müxtəlif müşahidə stansiyaları, o cümlədən Böyük Britaniyada yerləşən Goonhilly stansiyası Orion kapsulunun Ayın arxasından yenidən çıxacağı anı gözləyir.

Bildirilir ki, əlaqənin kəsildiyi müddətdə astronavtlar Ay üzərində müşahidələr aparacaq, geoloji tədqiqatlar həyata keçirəcək və əldə etdikləri məlumatları əlaqə bərpa olunduqdan sonra Yerə ötürəcəklər.