BAKI, VOA, Nailə Babazadə

Əfqanıstan hökuməti Pakistanın paytaxt Kabildə narkotik asılılığından müalicə mərkəzinə hava zərbəsi endirdiyini, nəticədə ən azı 400 nəfərin həlak olduğunu bildirib. Pakistan tərəfi isə bu ittihamı rədd edərək, yalnız hərbi hədəfləri vurduğunu iddia edir.

VOA xəbər verir ki, Əfqanıstan hökumət sözçüsünün müavini Həmdullah Fitrət "X" platformasında verdiyi açıqlamada, ötən gecə baş verən hava hücumunun "Ümid" adlı reabilitasiya mərkəzinin böyük hissəsini dağıtdığını qeyd edib. Məlumata görə, 400 ölü ilə yanaşı, 250-dən çox yaralı var. Xilasetmə qrupları hələ də dağıntılar altından cəsədləri çıxarmağa və binadakı yanğını söndürməyə çalışırlar.

Hökumət sözçüsü Zəbihullah Mücahid bu hücumu kəskin pisləyərək, Pakistanı mülki obyektləri və xəstəxanaları qəsdən hədəf almaqda, "bəşəriyyətə qarşı cinayət törətməkdə" ittiham edib. Kabil polisinin yaydığı görüntülərdə dağılmış xəstəxana binası və qaranlıqda fənərlərlə yaralıları daşıyan təhlükəsizlik qüvvələri əks olunub.

Pakistanın cavabı: "Biz terrorçuları vururuq"

İslamabad isə Əfqanıstanın iddialarını "yalan və çaşdırıcı" adlandırıb. Pakistan hərbi mənbələri bildirib ki, bazar ertəsi axşam saatlarında Kabildə terrorçulara dəstək verən iki hərbi obyekt, infrastruktur və sursat anbarı dəqiq zərbələrlə məhv edilib.

Bu qarşılıqlı bəyanatlar iki qonşu ölkə arasında son həftələrdə artan gərginliyin ən qanlı nöqtəsidir. Belə ki, Pakistan təyyarələrinin eyni vaxtda Əfqanıstanın daha 4 vilayətini və Qəndəhar hava limanı yaxınlığındakı yanacaq çənini vurduğu da bildirilir.

Əfqanıstanın qisası: Pilotsuz təyyarə hücumu

Cavab addımı olaraq, Əfqanıstan qüvvələri Pakistanın Xeybər-Paxtunxva əyalətindəki Kohat şəhərində yerləşən hərbi qalaya PUA hücumu təşkil edib. Təhlükəsizlik mənbələrinin məlumatına görə, hücum nəticəsində əsgərlərin qaldığı yerlər, silah anbarları və hərbi əməliyyat mərkəzi hədəf alınıb.