BAKI, VOA, Nailə Babazadə

İran lideri Ayetullah Əli Xameneyinin ABŞ və İsrailin hərbi hücumları nəticəsində həlak olmasından sonra ölkənin yeni rəhbərinin seçilməsi məsələsi gündəmə gəlib. Ekspertlər Şurasının (Məclis-i Xübreqan) üzvü Ayetullah Əli Müəllimi bildirib ki, yeni liderin müəyyənləşdirilməsi prosesi uzun çəkməyəcək.

VOA xəbər verir ki, İran Tələbələr Xəbər Agentliyinə (ISNA) danışan Müəllimi vurğulayıb ki, seçiləcək şəxs "İmam Mehdinin naibi" statusunda fəaliyyət göstərəcək qədər elmli və düşməndən qorxmayan cəsur bir fəqih olmalıdır. O, həmçinin qeyd edib ki, liderin seçimində siyasi yönümlər və partiyalar deyil, dini meyarlar və şura üzvlərinin birgə rəyi əsas götürüləcək.

İran Konstitusiyasının 111-ci maddəsinə əsasən, liderin ölümü halında Ekspertlər Şurası dərhal yeni rəhbəri müəyyən etməlidir. Yeni lider seçilənə qədər ölkəni müvəqqəti olaraq Prezident, Məhkəmə Hakimiyyətinin rəhbəri və Nizam-intizam Şurasının müəyyən etdiyi bir fəqihdən ibarət üç nəfərlik şura idarə edir.