BAKI, VOA, Nailə Babazadə
Şənbə günü Əfqanıstan hərbi və polis mənbələri Pakistanın bir qırıcısının Cəlalabad şəhərində vurulduğunu bəfyan edib. Polis sözçüsü Tayeb Hammad təyyarənin Cəlalabadın altıncı bölgəsində düşürüldüyünü və pilotun sağ olaraq əsir götürüldüyünü bildirib. Şahidlərin sözlərinə görə, pilot təyyarə qəzaya uğramazdan əvvəl paraşütlə tullanıb və dərhal saxlanılıb.
VOA xəbər verir ki, Pakistan və Taliban qüvvələri arasındakı döyüşlər artıq üçüncü gündür ki, davam edir. Beynəlxalq ictimaiyyətin ciddi narahatlığına baxmayaraq, tərəflər arasında gecə boyu şiddətli atışmalar qeydə alınıb. Pakistanın "Qəzəb Lil Haq" adlı əməliyyat çərçivəsində bir çox Taliban postunu məhv etdiyi bildirilir. Hər iki tərəf ağır itkilər verdiyini iddia edir; Pakistan 274 Taliban döyüşçüsünün, Taliban isə 55 Pakistan əsgərinin öldürüldüyünü bəyan edib (bu rəqəmlər müstəqil mənbələr tərəfindən hələ təsdiqlənməyib).
İslamabad Talibanı Pakistan daxilində hücumlar təşkil edən "Tehreek-e-Taliban Pakistan" (TTP) yaraqlılarına sığınacaq verməkdə ittiham edir. Pakistan bu hərbi əməliyyatları sərhədyanı hücumlara cavab kimi xarakterizə etsə də, Kabul bunu öz suverenliyinin pozulması kimi qiymətləndirir və genişmiqyaslı müharibənin ağır nəticələri olacağı barədə xəbərdarlıq edir.
Münaqişənin böyüməməsi üçün diplomatik addımlar da atılır. Əfqanıstanın xarici işlər naziri Əmir Xan Müttəqi Səudiyyə Ərəbistanının xarici işlər naziri ilə gərginliyin azaldılması barədə telefon danışığı aparıb. Avropa İttifaqı, BMT, Rusiya və Çin tərəfləri dərhal atəşi dayandırmağa və dialoqa çağırıb. ABŞ Dövlət Departamenti isə Pakistanın özünü müdafiə hüququnu dəstəklədiyini bildirib.
Pakistanın müdafiə naziri Xoca Məhəmməd Asif səbrlərinin daşdığını və baş verənləri "açıq müharibə" kimi təsvir edib. Digər tərəfdən, Talibanın daxili işlər naziri Siracuddin Haqqani bu müharibənin çox baha başa gələcəyini deyərək, texnoloji üstünlüyə deyil, birliyə və dözümə güvəndiklərini qeyd edib. Qeyd edək ki, Pakistanın müasir hərbi hava qüvvələri və böyük ordusu qarşısında Taliban əsasən yüngül silahlara və 20 illik partizan müharibəsi təcrübəsinə malikdir.