BAKI,VOA, Fərid Mikayılov

Macarıstan hökuməti Ukraynaya ayrılması planlaşdırılan 90 milyard avroluq Avropa İttifaqı (Aİ) kredit paketini bloklayacağını bəyan edib.

VOA xəbər verir ki, bu barədə ölkənin xarici işlər naziri Peter Siyarto açıqlama verib.

O, bildirib ki, Rusiyadan Macarıstana neft nəqlini təmin edən “Drujba” boru kəməri üzrə tranzit bərpa olunmayana qədər Budapeşt Kiyevə maliyyə dəstəyinə razılıq verməyəcək.

Siyarto sosial şəbəkə paylaşımında iddia edib ki, Ukrayna, Brüssel və Macarıstan müxalifəti aprel ayında keçiriləcək ümumi seçkilər ərəfəsində Baş nazir Viktor Orban hökumətinə təzyiq göstərmək üçün enerji axınını siyasi alətə çevirib.

“Drujba boru kəməri ilə Macarıstana neft tranziti bərpa edilənə qədər Ukrayna üçün nəzərdə tutulan 90 milyard avroluq Aİ kreditini bloklayırıq” - deyə Siyarto bildirib.

Macarıstan tərəfi Ukraynanı boru kəmərindəki zədənin aradan qaldırılması üçün yetərli addımlar atmamaqda və bununla ölkəyə “enerji şantajı” tətbiq etməkdə ittiham edir. Kiyev isə bu iddiaları rədd edir.

Mövcud gərginliyin əsas səbəbi Ukrayna ərazisindən keçən və Sovet dövründən qalan “Drujba” neft boru kəmərində yaranan zədələrdir. Kəmər Rusiyanın hücumları zamanı zərər görüb və bu, tranzit axınını məhdudlaşdırıb.

Avropa Komissiyası Macarıstanın neft ehtiyatları baxımından risk görmədiyini açıqlasa da, böhranın dərinləşməsi fonunda təcili toplantı çağıracağını bildirib.

Eyni zamanda Ukrayna sərt qış şəraitində Rusiya tərəfindən həyata keçirilən raket və pilotsuz uçuş aparatları hücumları nəticəsində enerji infrastrukturunun böyük hissəsini itirib. Bu isə ölkənin maliyyə və enerji baxımından xarici dəstəyə ehtiyacını artırıb.

Ukrayna Prezidenti Volodimir Zelenski maliyyə yardımının gecikməsinin ciddi nəticələrə səbəb ola biləcəyi barədə xəbərdarlıq edib və Rusiyaya qarşı yeni sanksiyalar paketi çağırışı edib.

Məlumata görə, Ursula von der Leyen və Antonio Kosta gələn həftə Kiyevə səfər edərək Ukraynaya siyasi dəstəyin davam etdiyini nümayiş etdirəcəklər.