BAKI, AzerVoice, Orxan Qədirzadə
Tunis istehsalı olan “Hind Rəcəbin səsi” filmi 98-ci Oskar mükafatları çərçivəsində beynəlxalq film nominasiyası üzrə mübarizəyə qoşularaq qlobal kino gündəminə daxil olub.
AzerVoice xəbər verir ki, film rəsmi şəkildə Tunisi “Ən yaxşı beynəlxalq film” nominasiyası üzrə təmsil etmək üçün seçilib. Tunisli rejissor Kövsər bin Hənniyyənin ekran işi 2024-cü ilin yanvarında Qəzza zolağında həlak olan fələstinli uşaq Hind Rəcəbin real həyat hekayəsinə əsaslanır.
Filmin süjet xətti hadisə zamanı qeydə alınmış real səs yazılarına söykənir və uşaq tərəfindən edilən kömək çağırışlarını mərkəzə gətirir. Ekran əsəri sənədli və bədii üslub arasında balans yaradaraq səsi hadisənin əsas mənəvi şahidi kimi təqdim edir.
“Hind Rəcəbin səsi”nin Oskar yarışına daxil edilməsi kino ilə aktual siyasi reallıqlar arasındakı həssas münasibətləri yenidən gündəmə gətirib. Müşahidəçilərin fikrincə, davam edən münaqişələrlə bağlı filmlər adətən mükafat mexanizmlərində daha mürəkkəb qiymətləndirmə mərhələsindən keçir.
Bu mövsüm ABŞ və Avropa istehsalı filmlər arasında ciddi rəqabət müşahidə olunur. “Günahkarlar”, “Bir döyüşdən sonra digəri” və “Emosional dəyər” kimi filmlər ön sıralarda yer alır. Bu kontekstdə birbaşa humanitar və siyasi mövzuya toxunan “Hind Rəcəbin səsi”nin siyahıda yer alması xüsusi diqqət çəkir.
Qeyd edək ki, Kino Sənətləri və Elmləri Akademiyası 98-ci Oskar mərasimi üçün ilkin namizədlərin adlarını bu gün açıqlamağa başlayıb. Mərasim 15 mart tarixində Los-Ancelesdə yerləşən “Dolbi” teatrında keçiriləcək. Tədbirin aparıcısı amerikalı komediya aktyoru və televiziya siması Konan Obrayen olacaq.
İlkin mərhələdə aktyor nominasiyalarında ən çox adı çəkilən filmlər “Bir döyüşdən sonra digəri” və Norveç istehsalı olan “Emosional dəyər” olub. Hər iki film yeni təsis edilən aktyor seçimi nominasiyasında da yer alıb ki, bu kateqoriya son 25 ildə ilk dəfə təqdim olunur.
