BAKI, AzerVoice, Nailə Babazadə
Paris cümə axşamı Fransa, Səudiyyə Ərəbistanı, ABŞ və Livanın nümayəndələrini bir araya gətirən dördtərəfli görüşə ev sahibliyi edəcək. Görüş İsrailin mümkün hərbi eskalasiyasının bir ildən artıqdır qüvvədə olan atəşkəs razılaşmasını pozacağı ilə bağlı artan narahatlıqlar fonunda baş tutacaq.
AzerVoice xəbər verir ki, Fransalı rəsmilər bildiriblər ki, İsrailin müharibəni bərpa etməklə bağlı təkrarlanan və açıq təhdidləri Livan üçün təcili təhlükə yaradır. Paris həmçinin ABŞ-ın İsrailin niyyətləri ilə bağlı mövqeyindəki qeyri-müəyyənlikdən narahatdır. Fransada hakim olan rəyə görə, ABŞ prezidenti Donald Tramp administrasiyası İsraili cilovlamağa meyilli deyil.
İsrail Livan ordusunu Litani çayının cənubunda Hizbullahın silahsızlaşdırılmasını nəzərdə tutan planın birinci mərhələsi üzrə hökumətin öhdəliklərini yerinə yetirməməkdə ittiham edir.
Bir tərəfdən İsrailin təzyiqi, digər tərəfdən isə Hizbullahın silahlarını təhvil verməkdən imtinası fonunda Paris Livanı qorumaq üçün çıxış yolu və aydın mexanizm axtarır. Fransa rəsmiləri Livan ordusunun iddiaların əksinə olaraq üzərinə düşən vəzifələri yerinə yetirdiyini nümayiş etdirmək niyyətindədir.
Bu kontekstdə Fransa Livan ordusunun atdığı addımları maddi və yoxlanıla bilən sübutlarla sənədləşdirəcək yeni mexanizmin yaradılmasını təklif edib. Paris həmçinin BMT-nin Livandakı Müvəqqəti Qüvvələrinin (UNIFIL) ordu bölmələrini yoxlama və müsadirə əməliyyatları zamanı müşayiət etməsini, prosesləri sənədləşdirməsini və nəticələrin ictimaiyyətə açıqlanmasını təklif edir.
Fransanın xarici işlər naziri Jan-Noel Barro bildirib ki, Fransa “Hizbullahın silahsızlaşdırılmasına nəzarət üçün ikinci mexanizm üzərində işləyir”.
Dekabrın 15-də Livan ordusunun rəhbərliyi tərəfindən ölkənin cənubunda təşkil olunan genişmiqyaslı səfər, eləcə də BMT Təhlükəsizlik Şurasına üzv ölkələrin nümayəndələri və yerli və beynəlxalq media üçün keçirilən turlar hökumətin və ordunun BMT Təhlükəsizlik Şurasının 1701 saylı qətnaməsinin icrasına sadiqliyini göstərmək məqsədi daşıyıb.
Son həftələr Paris Livan məsələsində diplomatik fəallığını artırıb. Cümə axşamı keçiriləcək görüş Fransa prezidenti Emmanuel Makronun Yaxın Şərq üzrə müşaviri Ann-Kler Lejandr və onun Livan üzrə şəxsi nümayəndəsi, sabiq xarici işlər naziri Jan-İv Le Drianın son bir ayda iki səfərini əhatə edən diplomatik səylərin yekunu sayılır.
Makron eyni zamanda Livan ordusuna və təhlükəsizlik qüvvələrinə dəstək konfransı, eləcə də iqtisadi yardım və bərpa üzrə ayrıca konfransla bağlı bir sıra mühüm telefon danışıqları aparıb. Hər iki tədbirin tarixi hələlik müəyyən edilməyib.