BAKI, AzerVoice, Nailə Babazadə

ABŞ administrasiyası, bu il tətbiq edilən səyahət qadağaları və məhdudiyyətlər çərçivəsində 19 ölkənin vətəndaşlarının immiqrasiya müraciətlərini müvəqqəti dayandırıb. ABŞ Vətəndaşlıq və İmmiqrasiya Xidmətləri (USCIS) verdiyi təlimatda, geniş araşdırma aparılana qədər bütün I-589 (sığınacaq) müraciətlərinin dondurulmasını bildirib.

AzerVoice xəbər verir ki,Trampın 5 iyunda imzaladığı fərmanla Əfqanıstan, Myanmar, Çad, Konqo Respublikası, Ekvatorial Qvineya, Eritreya, Haiti, İran, Liviya, Somali, Sudan və Yəmən vətəndaşlarına səyahət qadağası qoyulmuş, Burundi, Kuba, Laos, Syerra-Leone, Toqo, Türkmənistan və Venesuela vətəndaşlarına isə məhdudiyyətlər tətbiq edilmişdi. Bu ölkələr “yüksək riskli 19 ölkə” kimi təsnif edilir.

Qeyd edək ki, 26 noyabrda Ağ Ev yaxınlığında iki Milli Qvardiya üzvü güllələnib və şübhəli saxlanılıb. FBI hücumun tək şəxs tərəfindən törədildiyini açıqlayıb. Prokurorluq şübhəlinin 29 yaşlı Əfqanıstan vətəndaşı Rahmanullah Lakanwal olduğunu, yaralanan qvardiyaçılardan 20 yaşlı Sara Bekstromun həyatını itirdiyini bildirib. Lakanwal birinci dərəcəli qətldə ittiham olunacaq.

ABŞ mediası Lakanwalın 15 yaşından CIA ilə əməkdaşlıq etdiyini iddia edib. Müdafiə naziri Pit Hegseth hücumdan sonra Trampın göstərişi ilə Vaşinqtona 500 əlavə hərbçinin göndəriləcəyini açıqlayıb.