BAKI, AzerVoice, Nailə Babazadə

İran Prezidenti Məsud Pezeşkian bəyan edib ki, ölkəsi müharibə axtarışında deyil, lakin müdafiə qabiliyyətini gücləndirib və düşmən tərəfindən ediləcək hər hansı bir səhvə dərhal və dağıdıcı cavab veriləcək.

AzerVoice xəbər verir ki, Pezeşkian bu sözləri bazar ertəsi Tehranda, Kirman vilayətinin qubernatoru və İran parlamentinin nümayəndələri ilə görüş zamanı deyib. Görüşdə ölkənin cənub vilayətindəki problemlər və onların həlli yolları, eləcə də sanksiyalar və xarici təhdidlər müzakirə olunub.

Pezeşkian bildirib ki, İranın müdafiə imkanları iyun ayında İsrailin ABŞ-ın dəstəyi ilə başladığı 12 günlük müharibədən əvvəlki dövrlə müqayisədə daha da gücləndirilib.

“İran İslam Respublikası heç bir halda müharibə və qarşıdurma axtarmır. Lakin bu gün müdafiə qabiliyyətlərimiz o dövrlə müqayisə olunmayacaq dərəcədə güclüdür. Əgər düşmən səhv addım atarsa, dərhal və dağıdıcı bir cavabla üzləşəcək.” - deyə Pezeşkian qeyd edib.

Prezident həmçinin ABŞ və digər Qərb ölkələrinin tətbiq etdiyi sanksiyalara toxunaraq, bu məhdudiyyətlərin İran iqtisadiyyatına mənfi təsir göstərdiyini qeyd edib.

Onun sözlərinə görə, İran həm artan sanksiyalar, həm də daxili enerji balanssızlığı kimi problemlərlə eyni vaxtda mübarizə aparır. Lakin Pezəşkian vurğulayıb ki, qonşu ölkələrlə əlaqələrin gücləndirilməsi sanksiyaların təsirini azalda bilər.

“Əgər qonşularımızın imkanlarından düzgün istifadə etsək, sanksiyaları neytrallaşdıra və bunları regional əməkdaşlığı möhkəmləndirmək üçün real fürsətlərə çevirə bilərik.”- deyə Pezeşkian vurğulayıb.

Prezident həmçinin İslam ölkələrini birliyə çağıraraq, düşmənlərin İranı və digər müsəlman ölkələri zəiflətməyə və parçalamağa çalışdığını bildirib.