BAKI, AzerVoice

Danimarka pensiya yaşını 70-ə qaldıracaq.

AzerVoice xəbər verir ki, Danimarka Parlamenti pensiya yaşını 2040-cı ilə qədər 70-ə yüksəldən qanunu qəbul edib.

Yeni qərar qüvvəyə mindikdən sonra Danimarka Avropada ən yüksək pensiya yaşına malik ölkəyə çevriləcək.

Qeyd edək ki, ölkədə 2006-cı ildən etibarən pensiya yaşı gözlənilən ömür uzunluğuna əsasən müəyyən edilir və hər beş ildən bir yenidən nəzərdən keçirilir. Hazırda pensiya yaşı 67-dir. 2030-cu ildə bu rəqəm 68-ə, 2035-ci ildə isə 69-a qalxacaq. Yeni qanunla 1971-ci il yanvarın 1-dən sonra doğulanlar üçün pensiya yaşı 70 olacaq.

Qanun layihəsi cümə axşamı parlamentdə 81 "hə", 21 "xeyr" səsi ilə qəbul olunub.

Baş nazir Mette Frederiksen əvvəlki çıxışlarında pensiya yaşının avtomatik artırılmasının ədalətli olmadığını bildirmiş və bu prinsipə yenidən baxılmasının vacibliyini vurğulamışdı.

Danimarka ictimaiyyətində və həmkarlar ittifaqları arasında qərara qarşı ciddi narazılıq var. Paytaxt Kopenhagendə etiraz aksiyaları keçirilib. Həmkarlar İttifaqları Konfederasiyasının prezidenti Jesper Ettrup Rasmussen bu addımı “layiqli qocalığa zərbə” kimi qiymətləndirib.

Qeyd edək ki, Avropada pensiya yaşları ölkələrə görə dəyişir. İsveçdə pensiyaya çıxmaq üçün minimum yaş 63-dür, İtaliyada bu yaş 67-dir. Fransada isə 2023-cü ildən etibarən pensiya yaşı 62-dən 64-ə yüksəldilib.