BAKI,VOA,Yusif Şərifzadə

Rusiya Təhlükəsizlik Şurası sədrinin müavini Dmitri Medvedev hesab edir ki, ABŞ ilə İran arasında əldə olunmuş razılaşma yeni təxribatlar səbəbindən asanlıqla pozula bilər və hazırkı şəraitdə davamlı sülh gözləmək tələskən yanaşmadır.

VOA xəbər verir ki, Dmitri Medvedev bu fikirləri "Maks" sosial şəbəkəsində paylaşdığı açıqlamada səsləndirib.

Onun sözlərinə görə, qeyri-sabit razılaşma Livana qarşı yeni zərbələr və ya digər təxribatlar nəticəsində sürətlə dağıla bilər.

Medvedev bildirib ki, belə vəziyyət İsrailin Baş naziri Benyamin Netanyahunun hökumətinin maraqlarına uyğun ola bilər. O iddia edib ki, hazırkı İsrail hökuməti müharibə şəraitində fəaliyyətini davam etdirir və bu səbəbdən gərginliyin azalması onun maraqlarına uyğun gəlməyə bilər.

Rusiya rəsmisi qeyd edib ki, bu amillər nəzərə alınaraq yaxın dövrdə tam sabitliyin və davamlı sülhün əldə olunacağına dair gözləntilərə ehtiyatla yanaşmaq lazımdır.

Moskva ilə Tehran arasında münasibətlər son illərdə, xüsusilə Ukrayna müharibəsindən sonra daha da yaxınlaşıb. Tərəflər hərbi və iqtisadi əməkdaşlığı genişləndirsələr də, son ABŞ-İran və İsrail-İran qarşıdurması zamanı Rusiyanın dəstəyi əsasən siyasi bəyanatlarla məhdudlaşıb.