BAKI,VOA,Yusif Şərifzadə

İsveçrənin Bürqenştok bölgəsində diplomatik fəaliyyətlərin yenidən sürətləndiyi və müxtəlif ölkələrin nümayəndələri arasında intensiv təmasların davam etdiyi bildirilir.

VOA xəbər verir ki, Qətərin Baş naziri hələ də Bürqenştokda qalır və onun gözləniləndən daha uzun müddət bölgədə olacağı ehtimal edilir. Məlumata görə, o, ötən gecə İsveçrənin xarici işlər naziri ilə görüş keçirib. İsveçrə tərəfi hazırkı diplomatik prosesdə vasitəçilik rolunu oynayır.

Bu arada Pakistanın daxili işlər naziri Tehranda iranlı rəsmilərlə görüşlər keçirir. Pakistanın xarici işlər naziri isə Qahirədə Türkiyə, Pakistan, Səudiyyə Ərəbistanı və Misirin daxil olduğu dördtərəfli məsləhətləşmələrdə iştirak edir.

Məlumata görə, tərəflər bölgədəki son hadisələr və diplomatik prosesin gələcək mərhələləri ilə bağlı fikir mübadiləsi aparırlar.

Şahidlərdən birinin verdiyi məlumata əsasən, ABŞ Prezidenti Donald Trampın kürəkəni Cared Kuşner də Bürqenştokda müşahidə olunub. Bundan başqa, ABŞ-nin digər rəsmilərinin, o cümlədən Stiv Uitkoffun da bölgəyə gələ biləcəyi barədə məlumatlar yayılır.

Son 24-48 saat ərzində İsveçrədə keçirilməsi planlaşdırılan danışıqların əvvəlcə təxirə salınmasına baxmayaraq, hazırda diplomatik təmasların yenidən canlandığı və prosesin davam etdiyi bildirilir.