BAKI,VOA Orxan Qədirzadə

Avropa liderləri Donald Tramp administrasiyasının Almaniyadan minlərlə hərbçini çıxarmaq qərarını qitənin təhlükəsizliyi baxımından yeni siqnal kimi qiymətləndirir.

VOA xəbər verir ki, ABŞ Müdafiə Nazirliyi ölkədən təxminən 5 min hərbçinin çıxarılacağını açıqlasa da, Tramp bu sayın daha da artırılacağını bildirib. Qərarın səbəbi açıqlanmayıb.

Bildirilir ki, bu addım Şimali Atlantika Müqaviləsi Təşkilatı daxilində tərəfdaşlar üçün gözlənilməz olub. Qərarın eyni zamanda Almaniya kansleri Fridrix Merts ilə fikir ayrılıqları fonunda verildiyi qeyd olunur.

Norveçin Baş naziri Yonas Qar Störe bildirib ki, Avropanın öz təhlükəsizliyi üçün daha çox məsuliyyət götürməsi artıq gözlənilən prosesdir və bu qərar həmin tendensiyanı gücləndirir.

Avropa İttifaqının xarici siyasət üzrə nümayəndəsi Kaya Kallas isə ABŞ qoşunlarının çıxarılması ilə bağlı müzakirələrin əvvəllər də aparıldığını, lakin qərarın vaxtının sürpriz olduğunu vurğulayıb. Onun sözlərinə görə, bu vəziyyət NATO çərçivəsində Avropanın rolunun gücləndirilməsini zəruri edir.

Qeyd olunur ki, NATO rəsmiləri hazırda ABŞ tərəfi ilə qərarın detalları üzərində işləyir. Alyansın baş katibi Mark Rutte isə vəziyyəti şişirtməməyə çağıraraq Avropa ölkələrinin artıq təhlükəsizlik sahəsində addımlar atdığını bildirib.

Məlumata əsasən, ABŞ-ın bu addımı Avropa müttəfiqlərinin Yaxın Şərqdə, xüsusilə İranla bağlı münaqişədə iştirak məsələsində tərəddüd etməsi fonunda atılıb.

Qeyd edək ki, Avropa ölkələri son dövrlərdə təhlükəsizlik və müdafiə sahəsində daha müstəqil siyasət yürütmək istiqamətində fəaliyyətlərini gücləndirir.