BAKI,VOA, Fərid Mikayılov

Pakistan hökuməti ABŞ-ın tətbiq etdiyi məhdudiyyətlər və Hörmüz boğazında yaranmış blokada səbəbindən İrana yönələn yüklər üçün altı quru tranzit marşrutunun açıldığını açıqlayıb.

VOA xəbər verir ki, Pakistanın Ticarət Nazirliyinin qərarı ilə üçüncü ölkələrdən gələn malların Pakistan ərazisindən keçməklə avtomobil yolu ilə İrana çatdırılmasına icazə verilib.

Bu addım, xüsusilə Kəraçi limanında yığılıb qalan minlərlə konteynerin daşınması üçün alternativ marşrutun formalaşdırılmasına yönəlib.

Qeyd olunur ki, qərar İranın xarici işlər naziri Abbas Araqçinin İslamabada səfəri ilə eyni vaxta təsadüf edib. Səfər çərçivəsində Pakistanın baş naziri və ordu rəhbərliyi ilə görüşlər keçirilib.

Bildirilib ki, Pakistan regionda vasitəçilik təşəbbüslərini davam etdirərək Vaşinqton və Tehran arasında iki aydır davam edən gərginliyin azaldılmasına töhfə verməyə çalışır.

Ekspertlər hesab edir ki, bu qərar təkcə logistika baxımından deyil, həm də geosiyasi müstəvidə yeni balansların formalaşmasına təsir göstərə bilər.