BAKI,VOA

ABŞ Dövlət Departamentinin sözçüsü çərşənbə aqşamı təsdiqləyib ki, iyul ayında ABŞ-ın müstəqillik bəyannaməsinin 250 illiyi münasibətilə buraxılacaq yeni pasportlarda Prezident Donald Trampın şəkli yer alacaq.

VOA xəbər verir ki, Dövlət Departamentinin sözçüsü Tommi Piqot "X" platformasında bildirib ki,: "ABŞ iyul ayında yaradılmasının 250 illiyini qeyd edərkən, nazirlik bu tarixi hadisəni anmaq üçün xüsusi dizayn edilmiş məhdud sayda Amerika pasportlarını təqdim etməyə hazırlaşır".

Piqot "Fox News Digital" kanalının məqaləsini yenidən paylaşaraq yeni nümunəni nümayiş etdirib. Yeni pasportun daxili səhifələrində Trampın fotosu və qızılı rəngdə imzası, həmçinin 4 iyul 1776-cı ildə müstəqillik elan edildiyi gün "Qurucu Ataların" (Founding Fathers) təsviri yer alır.

İndiyə qədər vəzifədə olan heç bir ABŞ prezidentinin şəkli pasportlarda yer almayıb. Bu münasibətlə həmçinin üzərində Trampın təsviri olan qızıl xatirə sikkəsinin buraxılması da planlaşdırılır.

Hakimiyyətə qayıtdıqdan sonra paytaxtdakı bir neçə binaya, o cümlədən məşhur "Kennedi Mərkəzi" (Kennedy Center) zalına və Sülh İnstitutuna Trampın adı verilib. Tramp həmçinin 250 illik yubiley şənlikləri çərçivəsində 21-23 avqust tarixlərində Vaşinqtonda "IndyCar" avtomobil yarışlarını təşkil etməyi planlaşdırır.

Dövlət Departamentinin adının açıqlanmasını istəməyən rəsmisi aydınlıq gətirib ki, bu pasportlar yalnız Vaşinqtonda veriləcək və çox məhdud miqdarda mövcud olacaq.