BAKI,VOA, Fərid Mikayılov

Fransanın paytaxtında təhlükəsizlik tədbirləri çərçivəsində minlərlə insan təxliyə edilib.

VOA xəbər verir ki, Parisin şimal ətraflarında İkinci Dünya müharibəsindən qalan bombanın zərərsizləşdirilməsi üçün genişmiqyaslı əməliyyat həyata keçirilib.

Kolomb bölgəsində aşkar edilən partlayıcı qurğu səbəbindən ərazi sakinlərinə səhər saatlarınadək evlərini tərk etmək tapşırılıb. Təhlükəsizlik məqsədilə bombanın yerləşdiyi ərazinin 450 metr radiusunda yaşayanlar təxliyə olunub.

Bildirilib ki, ilkin olaraq bombanın mexaniki şəkildə zərərsizləşdirilməsi cəhdi uğursuz olub və nəticədə qurğu nəzarətli partlayışla məhv edilib.

Məlumata görə, əməliyyat uğurla başa çatıb və axşam saatlarında təxliyə qərarı ləğv olunub. Partlayıcı qurğu aprelin 10-da tikinti işləri zamanı aşkar edilib.

Bildirilib ki, əməliyyat zamanı təxminən 800 polis əməkdaşı təhlükəsizlik tədbirlərinə cəlb olunub. Sakinlər üçün müvəqqəti yerləşdirmə mərkəzləri yaradılıb və ehtiyacı olan şəxslərə tibbi yardım göstərilib.