BAKI,VOA, Orxan Qədirzadə

Donald Trump administrasiyasının iri avtomobil şirkətləri ilə hərbi texnika istehsalı üçün danışıqlar apardığı bildirilir.

VOA xəbər verir ki, The Wall Street Journal nəşrinin mənbələrə istinadən yaydığı xəbərdə qeyd olunur ki, ABŞ Müharibə Nazirliyi (Pentaqon) Ukrayna və İran istiqamətlərində davam edən münaqişələr fonunda silah istehsalını artırmaq niyyətindədir.

Bu çərçivədə administrasiya General Motors və Ford Motor Company kimi iri avtomobil istehsalçıları ilə əməkdaşlıq imkanlarını müzakirə edir. Bildirilir ki, müdafiə rəsmiləri şirkət rəhbərləri, o cümlədən Mary Barra və Jim Farley ilə görüşlər keçirib.

Mənbələrin sözlərinə görə, bu təşəbbüs ABŞ-ın azalan hərbi ehtiyatları ilə bağlıdır. Xüsusilə İranla bağlı gərginlik fonunda sursat və hərbi texnika ehtiyatlarının azalması istehsalın sürətlə artırılmasını zəruri edib.

Qeyd olunur ki, ABŞ ordusu sursat, raket, pilotsuz uçuş aparatları və digər hərbi avadanlıqların təminatını genişləndirmək üçün kommersiya sektorunun imkanlarından istifadə etməyi planlaşdırır. Rəsmilər bu məsələni “milli təhlükəsizlik” məsələsi kimi qiymətləndirir.

Eyni zamanda, Oshkosh Corporation şirkətinin artıq Pentaqonla əməkdaşlığa başladığı bildirilir. Şirkət ABŞ ordusu və müttəfiqləri üçün hərbi nəqliyyat vasitələrinin istehsalını həyata keçirir.

Ekspertlər qeyd edirlər ki, ABŞ-da mülki sənayenin geniş miqyasda hərbi istehsala cəlb olunması sonuncu dəfə İkinci Dünya Müharibəsi dövründə baş verib. Həmin vaxt Detroitdə yerləşən avtomobil istehsalçıları mülki istehsalı dayandıraraq bombardmançı təyyarələr, mühərriklər və hərbi texnika istehsal edirdi.

Məlumatda həmçinin qeyd olunur ki, hazırda hərbi istehsal əsasən məhdud sayda müdafiə podratçıları tərəfindən həyata keçirilir və yeni təşəbbüs avtomobil şirkətlərinin bu sahədə rolunu artırmağı hədəfləyir.