BAKI,VOA, Fərid Mikayılov

İsrailin Baş naziri Benyamin Netanyahu orduda yaranmış kadr çatışmazlığı səbəbindən məcburi hərbi xidmət müddətinin uzadılmasının gündəmə gətiriləcəyini açıqlayıb.

VOA xəbər verir ki, Netanyahu bu barədə təhlükəsizlik kabinetinin iclasında çıxışı zamanı danışıb.

O, Baş Qərargah rəisi Eyal Zamirin orduda ciddi personal böhranı ilə bağlı xəbərdarlığına münasibət bildirib.

Netanyahu qeyd edib ki, yəhudilər üçün müqəddəs sayılan Pesah (Həmdənsiz çörək bayramı) bayramından sonra məcburi hərbi xidmətlə bağlı yeni qanun layihəsi və xidmət müddətinin artırılması məsələsi müzakirəyə çıxarılacaq.

Baş nazir ultra-ortodoks yəhudilərin (haredilər) hərbi xidmətə cəlb olunması ilə bağlı qanunda dəyişikliklərə dair mübahisələrə də toxunaraq bildirib ki, hüquq məsləhətçilərinin rolu tövsiyə verməklə məhdudlaşır, qərar isə hökumət tərəfindən qəbul edilir.

İsrail ordusunun sözçüsü Efi Defrin hazırda orduda ümumilikdə 15 min nəfərlik çatışmazlıq olduğunu, bunun 8 mininin döyüş bölmələrinə aid olduğunu açıqlayıb.

Rəsmi şəxslər artan hərbi əməliyyatlar fonunda personal ehtiyacının yüksəldiyini vurğulayaraq bildiriblər ki, vəzifələrin sayı artdıqca, əsgər sayı azalır.

Qeyd edək ki, İsraildə hazırda kişilər üçün 32 ay, qadınlar üçün isə 24 ay məcburi hərbi xidmət tətbiq olunur. Xidmət müddətinin 36 aya qədər artırılması müzakirə edilir.