BAKI, VOA, Orxan Qədirzadə

Serbiya və İsveç rəhbərliyi ABŞ Prezidenti Donald Trampın İranın nüvə proqramına qarşı hərbi zərbə endirilməsi ehtimalını nəzərdən keçirdiyini bəyan etməsindən sonra öz vətəndaşlarına müraciət edərək bu ölkəni dərhal tərk etməyə çağırıb.

VOA xəbər verir ki, Serbiya Xarici İşlər Nazirliyi təhlükəsizlik vəziyyətinin kəskin pisləşməsi ilə əlaqədar ölkə vətəndaşlarına yaxın gələcəkdə İrana səfər etməməyi və hazırda orada olan şəxslərə mümkün qədər tez ölkədən çıxmağı tövsiyə edib. Oxşar çağırışla çıxış edən İsveçin xarici işlər naziri Mariya Malmer Stenerqard da sosial şəbəkə hesabı vasitəsilə İsveç vətəndaşlarını təcili şəkildə İranı tərk etməyə səsləyib.

Balkan ölkəsi hələ yanvarın ortalarında, İranda kütləvi etiraz aksiyalarına qarşı güc tətbiq edilməsi fonunda öz vətəndaşlarına bənzər xəbərdarlıqlar ünvanlamışdı. Lakin son günlərdə ABŞ-nin bölgədəki hərbi mövcudluğunu artırması gərginliyi pik həddə çatdırıb.

Xatırladaq ki, İran tərəfi cümə günü ABŞ ilə nüvə proqramı üzrə sürətli razılaşmaya ümid etdiyini bildirsə də, Prezident Donald Tramp Yaxın Şərqdə genişmiqyaslı dəniz qüvvələrinin cəmləşdirilməsi barədə əmr verib. Ağ Ev rəhbəri danışıqlar nəticə vermədiyi təqdirdə "məhdud hərbi zərbə" endirmək variantını ciddi şəkildə nəzərdən keçirdiyini bəyan edib. Hazırda bölgədə gərginlik artmaqda davam edir və beynəlxalq aviaşirkətlərin uçuş marşrutlarında dəyişikliklər edə biləcəyi gözlənilir.