BAKI,AzerVoice, Fərid Mikayılov

Ukraynanın paytaxtı Kiyev də daxil olmaqla bir sıra şəhərlərdə genişmiqyaslı elektrik enerjisi kəsintiləri qeydə alınıb.

AzerVoice xəbər verir ki, Kiyev meri Vitali Kliçko sosial şəbəkə hesabında bildirib ki, enerji təchizatının dayanması səbəbindən paytaxt metrosunun fəaliyyəti müvəqqəti olaraq dayandırılıb.

Onun sözlərinə görə, metro stansiyaları hazırda ehtiyat enerji mənbələri hesabına sığınacaq kimi istifadə olunur.

Kliçko qeyd edib ki, oxşar fasilələr ölkənin digər şəhərlərində də müşahidə edilir. Yerli medianın məlumatına görə, Kiyev və ətraf bölgələrdə su təchizatında da problemlər yaranıb.

Ukraynanın baş nazirinin birinci müavini və energetika naziri Denis Şmıqal açıqlamasında bildirib ki, Rumıniya və Moldova enerji sistemləri arasındakı 400 kilovoltluq xəttlə Ukraynanın qərb və mərkəzi hissələrini birləşdirən 750 kilovoltluq xəttin eyni vaxtda sıradan çıxması texniki nasazlığa səbəb olub.

Nazirin sözlərinə görə, bu hadisə elektrik şəbəkəsində mərhələli kəsintilərə və yarımstansiyalarda avtomatik qoruma sistemlərinin işə düşməsinə gətirib çıxarıb. Nəticədə bəzi atom elektrik stansiyalarının blokları müvəqqəti olaraq dayandırılıb.