BAKI, AzerVoice, Fərid Mikayılov
İran Xarici İşlər Nazirliyi ABŞ-ın Venesuela sahilləri yaxınlığında artan hərbi fəaliyyətlərini beynəlxalq hüququn və BMT Nizamnaməsinin açıq şəkildə pozulması kimi qiymətləndirib.
AzerVoice xəbər verir ki, İran Xarici İşlər Nazirliyinin sözçüsü İsmayıl Bəqai bildirib ki, ABŞ-ın bölgədəki hərbi addımları, o cümlədən balıqçı gəmilərinə təkrar hücumlar və Venesuelaya qarşı güc tətbiqi ilə hədələmələr, beynəlxalq münasibətlərdə zor tətbiq etməmək prinsipinə ziddir.
“ABŞ-ın bu təxribat xarakterli və qeyri-qanuni hərəkətləri beynəlxalq sülh və təhlükəsizlik üçün ciddi təhdiddir,” – deyə Bəqai vurğulayıb.
O, həmçinin, Birləşmiş Millətlər Təşkilatının Təhlükəsizlik Şurasını beynəlxalq sabitliyə qarşı hər hansı təcavüz aktının qarşısını almaq üçün məsuliyyət daşımağa çağırıb.
Bəqai əlavə edib ki, İran beynəlxalq hüququn aliliyini və dövlətlərin suverenliyinə hörmət prinsipini müdafiə etməkdə davam edəcək.