BAKI, AzerVoice, Nərmin Ağayeva

Livanın cənubunda qəzaya uğrayan İsrailə məxsus pilotsuz təyyarə yoxlama zamanı partlayaraq iki Livan əsgərinin həlak olmasına səbəb olub.

AzerVoice xəbər verir ki, Livanın rəsmi xəbər agentliyi NNA-nın məlumatına görə, İsrail ordusuna məxsus bomba yüklü pilotsuz təyyarə Surun Naqoura qəsəbəsində tikinti texnikasına çırpılaraq qəzaya uğrayıb. Qəza yerində yoxlama aparılarkən təyyarənin partlaması nəticəsində iki Livan əsgəri həyatını itirib.

Livan Prezidenti Cozef Aun hadisə ilə bağlı ordusuna başsağlığı verərək, “Ordu cənubda sabitliyin qorunması uğrunda qanı ilə bədəl ödəyir,” deyə qeyd edib. Baş nazir Navaf Salam isə müdafiə naziri Mişel Menassaya zəng edərək həlak olan əsgərlər üçün başsağlığı verib və ordunun “təhlükəsizlik, suverenlik qalası və milli birliyin sütunu” olduğunu vurğulayıb.

Qeyd edək ki, bu hadisə Livanın cənubunda İsrailin pilotsuz təyyarələrinin fəaliyyətinin regionda gərginliyi artırması fonunda baş verib. İsrailin bu cür dronları tez-tez Livan ərazisində kəşfiyyat və ya hücum məqsədləri ilə istifadə olunur, bu da yerli əhali və ordu üçün ciddi təhlükə yaradır.