BAKI, AzerVoice, Nərmin Ağayeva

Rohingiya müsəlmanları zorakılıqlar bitmədən Myanmaya qayıda bilməz.

AzerVoice xəbər verir ki, BMT-nin Myanma üzrə Müstəqil İstintaq Mexanizminin rəhbəri Nikolas Koumjian Banqladeşə sığınan bir milyondan çox Rohingiya müsəlmanının onlara qarşı zorakılıqlar dayanmadan və məsul şəxslər məhkəmə qarşısına çıxarılmadan Myanmaya təhlükəsiz şəkildə qayıda bilməyəcəyini bildirib.

BMT-nin açıqlamasında qeyd olunub ki, son 18 ayda Rakhayn əyalətində artan zorakılıqlar nəticəsində təxminən 150 min nəfər əlavə olaraq Banqladeşə sığınıb. İstintaq Mexanizmi kəndlərin yandırılması, qətllər, işgəncələr və zorlamalarla bağlı yeni araşdırmalara başlayıb.

Koumjian vurğulayıb ki, törədilən cinayətlərə görə indiyədək heç kim məsuliyyətə cəlb edilməyib. “Bu, zorakılığı daha da artırır. Rohingiya qaçqınları evlərinə qayıtmaq istəyirlər, lakin bunu yalnız təhlükəsiz olduqda edə bilərlər”, – deyə o bildirib.

Məlumata görə, Koumjian avqustun 24-25-də Banqladeşin Koks Bazar şəhərində Rohingiya müsəlmanlarının vəziyyətinə dair keçiriləcək “maraqlı tərəflərin dialoqu” toplantısında iştirak edəcək.

Qeyd edək ki, 2017-ci ilin avqustundan etibarən 900 mindən çox Rohingiya müsəlmanı Myanmanın Rakhayn əyalətini tərk edərək Banqladeşə sığınıb. Onların yarısı uşaqlardır. BMT və beynəlxalq insan haqları təşkilatları Rohingiyalılara qarşı törədilən zorakılığı “etnik təmizləmə” və “soyqırım” kimi qiymətləndirir.