BAKI, AzerVoice, Nərmin Ağayeva

İranda həddindən artıq istilərə görə dövlət müəssisələri bağlanıb.

AzerVoice xəbər verir ki, avqustun 23-də paytaxt Tehran da daxil olmaqla ən azı 13 əyalətdə dövlət qurumlarının fəaliyyətinə ara verilib. Qərarın, yüksək temperaturun yaratdığı enerji istehlakının qarşısını almaq və ölkənin enerji sistemini qorumaq məqsədilə qəbul edildiyi bildirilib.

Məlumata görə, Əlburz, Yəzd, İsfahan, Şərqi Azərbaycan, Qərbi Azərbaycan, Kürdüstan, Rəzəvi Xorasan, Cənubi Xorasan, Qum, Kirman, Xuzistan və Şimali Xorasan da qərara daxil olan əyalətlər arasındadır. Digər bölgələrdə isə iş saatları səhər 06:00-dan 11:00-a endirilib.

Qeyd edək ki, İran Meteorologiya Xidməti Xuzistan və İlamda temperaturun 45 dərəcəni keçdiyini, Tehranda isə 40 dərəcəyə yaxınlaşdığını açıqlayıb. Səlahiyyətlilər vətəndaşları zərurət olmadıqca küçəyə çıxmamağa və elektrik enerjisindən minimum istifadə etməyə çağırıb. Son həftələrdə enerji çatışmazlığı səbəbilə bəzi bölgələrdə gündəlik iki saatlıq elektrik kəsintisi tətbiq olunur.