BAKI, AzerVoice, Nərmin Ağayeva

Macarıstan, Ukraynanı Rusiya xam neftini Avropaya daşıyan “Drujba” neft kəmərinə hücum etməkdə ittiham edərək, elektrik enerjisi təchizatını kəsməklə hədələyib.

AzerVoice xəbər verir ki, Macarıstanın xarici işlər naziri Peter Szijjarto hücumdan sonra Rusiya neftinin Macarıstana nəqlinin dayandığını açıqlayıb. O, “Ukrayna yenidən Macarıstana gedən neft kəmərinə hücum edərək, ölkəmizə neft axınının kəsilməsinə səbəb oldu. Bu, enerji təhlükəsizliyimizə qarşı qəbuledilməz bir hücumdur” - deyə bildirib.

Nazir əlavə edib ki, məsələ ilə bağlı Rusiya energetika nazirinin müavini Pavel Sorokin ilə danışıb və rusiyalı mütəxəssislərin transformator stansiyasının tezliklə işə bərpa olunması üçün çalışdıqlarını qeyd edib. Lakin neft nəqlinin nə vaxt bərpa olunacağı hələlik məlum deyil.

Szijjarto həmçinin Avropa İttifaqını və Kiyevi tənqid edərək, “Brüssel və Kiyev üç il yarımdır ki, Macarıstanı Ukraynadakı müharibəyə çəkməyə çalışır. Açıq deyim: bu müharibə bizim deyil və biz iştirak etmək niyyətində deyilik”- deyə vurğulayıb. O, Ukraynanın enerji tələbatında Macarıstandan ixrac olunan elektrik enerjisinin mühüm rol oynadığını da xatırladıb.

Ukraynanın xarici işlər nazirinin müavini Andrii Sybiha isə hücumu təsdiq və ya təkzib etmədən bildirib ki, Budapeşt şikayətlərini Moskvaya ünvanlamalıdır.
“Bu müharibəni başlayan və dayandırmaqdan imtina edən Ukrayna deyil, Rusiyadır. Buna baxmayaraq, Macarıstan Rusiyadan asılı qalmaq üçün hər cür səy göstərir”. - deyə o bildirib.

Qeyd edək ki, Macarıstan xam neftinin əsas hissəsini Belarus və Ukrayna ərazisindən keçən “Drujba” kəməri ilə idxal edir. Kəmər eyni zamanda Rusiya neftini Slovakiyaya da daşıyır. Neft nəqlində fasilə avqustun 13-də Ukraynanın Rusiyanın Bryansk vilayətindəki neft nasos stansiyasına pilotsuz təyyarələrlə zərbə endirməsindən sonra baş verib.