BAKI, AzerVoice, Səməd Əyyubov – ABŞ-ın Corciya ştatında yerləşən Fort Stüart hərbi bazasında naməlum şəxs atəş açıb, hərbi obyektin bir hissəsi bağlanıb.

AzerVoice xəbər verir ki, bu barədə “Associated Press” agentliyi məlumat yayıb.

“Hazırda vəziyyəti qiymətləndiririk, lakin silahlı insidentin baş verdiyini təsdiq edə bilərik” - deyə, leytenant-polkovnik Ancel Tomko bildirib.

Baza rəhbərliyinin “Facebook” səhifəsində yaydığı açıqlamada, insident nəticəsində xəsarət alanların olduğu, lakin ümumi vəziyyətin sabit qaldığı bildirilib. Corciya qubernatoru Brayan Kemp hadisə yerinə gələn hüquq-mühafizə orqanları ilə əlaqə saxlayır.

Hadisə ilə bağlı əlavə təfərrüatlar açıqlanmayıb.

Məlumat üçün bildirək ki, Fort Stüart ABŞ-ın ən böyük hərbi bazalarından biridir və burada minlərlə hərbçi yerləşir.

Qeyd edək ki, ötən ilin dekabrında ABŞ-ın Corciyada yerləşən Fort Eyzenhauer bazasında atışma baş vermişdi. Bazanın mətbuat xidməti həmin insidentin təcrid olunmuş hadisə olduğunu bildirmişdi. Atışma bazanın ərazisindəki yaşayış evində baş vermiş, bir nəfər aldığı xəsarətlər nəticəsində ölmüşdü. Silahlı şəxsin kimliyi barədə məlumat verilməmişdi.