BAKI, AzerVoice

Suriyada ötən ilin dekabr ayında Bəşər Əsədin devrilməsindən sonra ilk parlament seçkilərinin keçirilməsi üçün tarix dəqiqləşməyə başlayıb.

AzerVoice xəbər verir ki, bu barədə Suriya Ali Seçki Komitəsinin sədri Məhəmməd Taha əl-Əhməd məlumat verib.

O bildirib ki, seçki sistemində edilən dəyişikliklər və planlaşdırılan fəaliyyətlərlə bağlı Suriya Prezidenti Əhməd əş-Şəraaya məlumat verilib. Əl-Əhmədin sözlərinə görə, Şəraa ölkənin bütün vilayətlərində seçkilərin keçirilməsinin vacibliyini vurğulayıb və ölkənin parçalanmasına dəstək verənlər və məzhəbçiliyə çağıranların prosesdən kənarlaşdırılmalı olduğunu bildirib.

Əl-Əhməd qeyd edib ki, parlamentdəki deputat sayı 150-dən 210-a yüksəldiləcək.

“Müvəqqəti seçki sisteminə dair fərman imzalandıqdan sonra alt komitələrin formalaşdırılması üçün bir həftə vaxt lazım olacaq. Bu komitələrə isə 15 gün müddət veriləcək. Sonra namizədlərin qeydiyyatı başlayacaq. Namizədlərə seçki proqramlarını hazırlamaları üçün bir həftə vaxt veriləcək” – deyə, o bildirib.

Parlament seçkilərinin 15-20 sentyabr tarixləri arasında keçirilməsi planlaşdırılır. Əl-Əhməd bildirib ki, qadın namizədlərin ümumi namizədlər arasında ən azı 20 faiz təşkil etməsi gözlənilir. Seçki prosesi Ali Seçki Komissiyasının nəzarəti altında aparılacaq və ictimaiyyətin və beynəlxalq təşkilatların müşahidəsinə açıq olacaq. Eyni zamanda, namizəd siyahılarına və nəticələrə etiraz etmək hüququ da təmin ediləcək.

Qeyd edək ki, ötən il 8 dekabr tarixində Suriyada müxalifət qüvvələri Dəməşqə daxil oldular və Bəşşar Əsəd prezident postunu tərk edərək ölkəni tərk etdi. Suriyanın faktiki lideri Əhməd əş-Şəraa oldu.