BAKI, AzerVoice

Şimali Koreyadan qaçan şəxs Kim Çen Ina qarşı Seulda məhkəmə iddiası qaldıracaq.

AzerVoice xəbər verir ki, Şimali Koreyadan qaçaraq Cənubi Koreyaya sığınan Çoi Min Kyunq adlı vətəndaş Şimali Koreya lideri Kim Çen Ina qarşı insan hüquqlarının pozulması ilə bağlı Seul Mərkəzi Dairə Məhkəməsində məhkəmə iddiası qaldırmağa hazırlaşır.

Bu barədə məlumat Şimali Koreya İnsan Haqları Məlumat Mərkəzi (NKDB) tərəfindən yayımlanan açıqlamada yer alıb.

Açıqlamaya görə, Çoi 1997-ci ildə ilk dəfə Çinə qaçıb, lakin 2008-ci ildə Şimali Koreyaya geri göndərildikdən sonra 5 ay ərzində müxtəlif saxlama mərkəzlərində fiziki və psixoloji zorakılıqlara məruz qalıb.

NKDB bildirir ki, Çoi saxlandığı müddətdə döyülüb, cinsi təcavüzə uğrayıb, düzgün qidalanmayıb və tibbi yardımdan məhrum edilib. O, bu hadisələrə görə Şimali Koreya liderini və bəzi məmurları məsuliyyətli sayır.

İddia Seul Mərkəzi Dairə Məhkəməsində qaldırılacaq və paralel olaraq Seul Mərkəzi Prokurorluğuna cinayət işi üzrə müraciət ediləcək.

Qeyd edək ki, bu, Cənubi Koreyada Şimali Koreya rəhbərinə qarşı açılacaq ilk belə iddia olacaq. Hüquq müdafiəçiləri bu hadisəni insan haqları pozuntularına qarşı beynəlxalq hüquqi mübarizədə əlamətdar addım kimi dəyərləndirirlər.