BAKI, AzerVoice
BRİKS sammitində Rusiya xarici işlər naziri Lavrov qlobal iqtisadi sistemdə şəffaflıq və bərabərlik çağırışı edib.
AzerVoice xəbər verir ki, Rusiya
xarici işlər naziri Sergey Lavrov Braziliyanın Rio-de-Janeyro
şəhərində keçirilən 17-ci BRİKS Liderlər Zirvə toplantısında çıxış
edib.
O, çıxışında qlobal iqtisadi sistemin universallıq, şəffaflıq və
bərabərlik prinsipləri əsasında yenidən qurulmasının vacibliyini
vurğulayıb. Lavrov bildirib ki, BRİKS bu prinsiplərə əsaslanan
sabit iqtisadi model yaratmağa çalışır və hazırda qlobal
iqtisadiyyatın 40 faizindən çoxuna nəzarət edir.
O, ABŞ dollarına etimadın azaldığını, inkişaf etmiş ölkələrdə borc
səviyyəsinin rekord həddə çatdığını qeyd edərək, inkişaf etməkdə
olan ölkələrin Qərbdən asılı olmayan iqtisadi mexanizmlərə üstünlük
verdiyini deyib. Lavrov əlavə edib ki, BRİKS daxilində ticarətin 90
faizi milli valyutalarla aparılır.
Qeyd edək ki, BRİKS-in 17-ci Zirvə toplantısı 2025-ci ildə Braziliyanın ev sahibliyi ilə keçirilir. Sammitdə çoxqütblü dünya düzəni, regional əməkdaşlıq və qlobal maliyyə institutlarının islahatı əsas müzakirə mövzularındandır.