BAKI, AzerVoice

ABŞ Yaxın Şərqdəki hərbi və diplomatik aktivlərini qoruyacağını açıqlayıb.

AzerVoice xəbər verir ki, ABŞ müdafiə naziri Pit Heqseth Yaxın Şərqdə artan gərginlik fonunda ölkəsinin bölgədəki hərbi və diplomatik mövqelərinin qorunacağını bəyan edib.

Heqseth “Biz ayıq və hazırıq. Əvvəldən bildiririk ki, burada vətəndaşlarımızı və maraqlarımızı qorumaq üçün varıq” - deyə vurğulayıb.

Nazir bildirib ki, ABŞ prezidenti Donald Tramp İran və İsrail arasında sülh əldə olunmasını arzulayır və İranla nüvə sazişi bağlamağı hədəfləyir. “Prezident Tramp açıq şəkildə bildirib ki, razılaşma masadadır. Sual budur ki, İran bu fürsəti dəyərləndirəcəkmi?” - deyə o qeyd edib.

Pit Heqseth özünün X hesabında paylaşdığı bəyanatda bölgəyə “əlavə imkanlar yerləşdirmək” əmri verdiyini də açıqlayıb.

Qeyd edək ki, İsrailin iyunun 13-də İranın müxtəlif şəhərlərindəki nüvə obyektlərini və yüksək rütbəli hərbi rəhbərliyi hədəf alması ilə başlayan hücumlar nəticəsində İranın Baş Qərargah rəisi, İnqilab Keşikçiləri Korpusunun rəhbəri və 9 nüvə alimi daxil olmaqla onlarla şəxs həlak olub. Mülki itkilərin sayı 224 nəfər olaraq açıqlanıb. İranın ballistik raketlərlə cavab zərbələri nəticəsində isə İsraildə 24 nəfər ölüb, 500-dən çox insan yaralanıb. Bir çox ölkə, xüsusilə də Türkiyə, İsrailin bu hücumlarını qınayıb.