BAKI, AzerVoice

Yunanıstan, bölgədə artan qeyri-sabitlik şəraitində Livan Silahlı Qüvvələri ilə əməkdaşlığı gücləndirmək məqsədilə bu ölkəyə 13 ədəd M113 tipli zirehli personal daşıyıcı (ZPT) texnika hədiyyə etməyə qərar verib.

AzerVoice xəbər verir ki, qərar Yunanıstan Parlamenti tərəfindən qəbul edilib və Livan Prezidenti Cozef Aunun Baş nazir Kiriakos Miçotakisa ünvanladığı rəsmi müraciətdən sonra rəsmiləşib.

Hədiyyə ediləcək texnikalar Yunanıstan Quru Qoşunlarının arsenalından təmin olunacaq. Texniki baxış və təmir proseslərindən sonra 13 ədəd ZPT Livana təhvil veriləcək.

Zirehli texnikaların verilməsi, Aunun hələ Livan Silahlı Qüvvələrinin baş komandanı olduğu dövrdə başlanmış danışıqların nəticəsi hesab olunur. Təhvil prosesi, Afina ilə Beyrut arasında Livan Ordusunun struktur islahatlarını dəstəkləyən genişmiqyaslı əməkdaşlıq çərçivəsində həyata keçiriləcək.

Mövcud əməkdaşlıq yalnız texnika ilə məhdudlaşmır. Yunanıstan tərəfi Livanlı zabitlərin öz hərbi məktəblərində, o cümlədən Quru Qoşunları və Dəniz Qüvvələri Akademiyalarında təlim görməsinə dəstək verir. Gələcəkdə bu proqramların miqyası genişləndiriləcək.

Eyni zamanda, iki ölkə arasında dəniz təhlükəsizliyi sahəsində əməkdaşlıqla bağlı danışıqların da davam etdiyi bildirilir.