BAKI, AzerVoice

ABŞ vitse-prezidenti Cey Di Vens, Qəzza zolağındakı münaqişə zamanı vətəndaşların, xüsusən də uşaqların çəkdiyi əzabdan kədərləndiyini bildirib.

AzerVoice xəbər verir ki, bunu Vens komik Teo Fon ilə bir podkastda müsahibə verərkən deyib.

"Bu videoları və şəkilləri görürəm, həqiqətən ürək dağlayan şəkillərdir" - deyə, o Fonun Qəzzadakı uşaqların videoları haqqında dediklərinə cavab verib.

Vens, İsrailin Fələstin bölgəsində soyqırımı törətmədiyini inkar edib. O, eyni zamanda bildirib ki, ABŞ administrasiyası iki problemi həll etməyə çalışır: bir tərəfdən, günahsız Fələstin vətəndaşları və HƏMAS tərəfindən girov götürülmüş israillilər, digər tərəfdən isə İsrailin "terror təşkilatlarından" gələn hücumlarla qarşılaşması.

"Bəziləri unudur ki, bu müharibəyə səbəb olan şey qanlı bir terror hücumu oldu və bu hücumda çox sayda israilli mülki vətəndaş həyatını itirdi" - deyə, o əlavə edib.

Teo Fonun Qəzzadakı hadisələri soyqırımı kimi təsvir etməsinə cavab olaraq Vens bildirib: "İsrailin bütün fələstinliləri öldürməyə çalışdığını düşünmürəm. Məncə, onlar hücuma məruz qaldılar və indi terror təşkilatını məhv etməyə çalışırlar. Müharibə cəhənnəmdir."

Vens, ABŞ administrasiyasının münaqişəni sona çatdırmaq və humanitar yardımlar göndərmək üçün səylərini davam etdirdiyini təsdiqləyib və eyni zamanda İsrailin tərəfdarı olan bəzi Respublikaçı şəxsləri tənqid edərək, ABŞ-ın Yaxın Şərq üzrə xüsusi nümayəndəsi Stiven Uitkoffun "İsraili kifayət qədər dəstəkləməməkdə" ittiham edildiyini bildirib.