BAKI, AzerVoice

Pentaqonun UNO sirri ifşa olundu- Gizli silah proqramları ört-basdır edilib.

AzerVoicexəbər verir ki, ABŞ mətbuatında yayımlanan araşdırmalar Pentaqonun uzun illər ərzində UNO (naməlum uçan obyekt) mövzusunu bilərəkdən gündəmdə saxladığını və bu vasitə ilə gizli silah proqramlarını ictimaiyyətin diqqətindən yayındırmağa çalışdığını ortaya qoyub.

"The Wall Street Journal" qəzetinin məlumatına görə, ABŞ Müdafiə Nazirliyinin bəzi bölmələri tərəfindən yayılan UNO mifologiyası, əslində hərbi məqsədlərlə həyata keçirilən bir dezinformasiya kampaniyasının tərkib hissəsi olub. Araşdırma zamanı məlum olub ki, bu fəaliyyətlər təkcə ictimai rəyi çaşdırmaqla kifayətlənməyib, həm də SSRİ-yə qarşı strateji üstünlük qazanmaq məqsədi daşıyıb.

1980-ci illərdə bir hərbi polkovnikin "Area 51" yaxınlığındakı barda UNO şəkilləri yaydığı və bununla da yerli əhali arasında yadplanetli texnologiyaların mövcudluğu ilə bağlı təəssürat yaratmağa çalışdığı təsdiqlənib. Həmin polkovnikin 2023-cü ildə verdiyi etirafda bildirilir ki, bu şəkillər sadəcə diqqəti əslində test edilən məxfi F-117 tipli qırıcı təyyarələrdən yayındırmaq məqsədi daşıyıb.

Qeyd olunur ki, bu günə qədər UNO-lar haqqında aparılan bir çox rəsmi hesabatlar və açıqlamalar da ictimaiyyəti çaşdırmaq məqsədilə hazırlanıb. WSJ-nin iddiasına görə, keçən il yayımlanan və yadplanetli texnologiyaların gizlədilmədiyini bildirən rəsmi hesabat belə, əslində bu dezinformasiyanı ört-basdır etməyə xidmət edib.

Məsələni araşdıran ekspertlər hazırda bu cür saxta məlumat yayma kampaniyalarının sadəcə lokal komandirlərin təşəbbüsü ilə, yoxsa mərkəzi və institusional proqram çərçivəsində həyata keçirildiyini müəyyən etməyə çalışır.