BAKI, AzerVoice

ABŞ-ın BMT Təhlükəsizlik Şurasında Qəzza sektorunda atəşkəs tələb edən qətnamə layihəsinə veto qoyması ABŞ administrasiyasının mənəvi tənəzzülünün göstəricisidir.

AzerVoice xəbər verir ki, bunu İran Xarici İşlər Nazirliyinin rəsmi nümayəndəsi İsmayıl Bəqai deyib.

"Qəzza zolağında sionist rejimdən soyqırımı dayandırmağı tələb edən qətnaməyə veto qoyulması ABŞ-ın beynəlxalq ictimaiyyətin və İsrail cinayətlərinin dayandırılmasını tələb edən region xalqlarının iradəsini saymamazlıq etməsinin göstəricisi olmaqla yanaşı, ABŞ-dakı qərar qəbul edən şəxslərin mənəvi tənəzzülünün və işğal olunmuş Fələstin ərazilərində uşaqlar da daxil olmaqla kütləvi qətllərdə şərikliyinin sübutudur", - deyə Bəqai vurğulayıb.

Xatırladaq ki, iyunun 4-də ABŞ BMT TŞ-də Qəzza zolağı ilə bağlı qətnamə layihəsinə veto qoyub. Sənəddə xüsusilə, Qəzzada dərhal, qeyd-şərtsiz və daimi atəşkəsin elan edilməsi, habelə Qəzzada saxlanılan bütün girovların azad edilməsi tələb olunur. Qətnamə layihəsi BMT TŞ-nin on qeyri-daimi üzvü tərəfindən hazırlanmışdı. ABŞ Təhlükəsizlik Şurasında qətnaməni dəstəkləməyən yeganə ölkə olub.