Bakı. AzerVoice:
Fransanın paytaxtı Parisdə Avropa Parlamenti (AP) seçkilərində ifrat sağçıların böyük fərqlə birinci olmasından sonra vətəndaşlar küçələrə axışıb.
AzerVoice xəbər verir ki, ifrat sağçı əleyhdarı yüzlərlə nümayişçi Parisin tarixi Respublika meydanına toplaşıb.
Nümayişçilər “Gənclər, ayağa qalx” şüarları səsləndirərək, AP seçkilərində ifrat sağçı Milli Birlik Partiyasının (MN) birinci olmasına etiraz ediblər. Onlar qarşıdan gələn yerli seçkilərdə solçu partiyaların birləşməsini tələb ediblər.
Fransada keçirilən AP seçkilərində ifrat sağçı RN 31,50 faiz səs çoxluğu ilə birinci, prezident Emmanuel Makronun partiyası Rönesans isə 15,2 faiz səslə ikinci olub.
Partiyasının böyük fərqlə məğlub olmasından sonra açıqlama verən Makron nəticələrin “Avropanı müdafiə edən partiyalar üçün yaxşı olmadığını” etiraf edib və erkən seçkilərin 30 iyun - 7 iyul tarixlərində keçiriləcəyini bildirib.
